Ordumuzun Naxçıvan istiqamətində irəliləməsi barədə yeni məlumatlar yayılıb.
Ordu.az razm.info istinadən xəbər verir ki, peyk görüntüləri may ayında Naxçıvanın şimal-şərq hissəsində Azərbaycan ordusunun azad etdiyi yeni mövqeləri və əraziləri göstərir.
Sayt təqdim etdiyi araşdırmada, Ermənistan tərəfinin həyata keçirdiyi fəaliyyətlərə toxunmayaraq, rəsmi mənbələrdən heç bir təfərrüatın olmadığını qeyd edib.
Araşdırmada, cari ilin may ayının 2-dən 27-dək olan müddət ərzində xüsusən də peyk şəkillərində görünən dəyişikliklər, qısa müddət ərzində həyata keçirilmiş mühəndis işləri, yeni mövqelərə doğru gedən yeni yolların salınması təqdim edilib.
Araşdırmalara əsasən, Azərbaycan Silahlı Qüvvələri Arpa (Areni) kənd bağları və tərk edilmiş Günnüt kəndi istiqamətində irəliləyərək bir sıra əraziləri azad edib. İrəliləmə əlamətləri 2 may tarixindən etibarən nəzərə çarpsa da, əsas işlərin 17-27 may tarixləri arasında həyata keçirildiyi qeyd olunur.
İrəliləmə istiqamətlərini daha aydın şəkildə göstərmək məqsədilə, mövqelər şərti olaraq A, B və C hissələri kimi təqdim edilib.
Günnüt kəndi istiqamətində irəliləməklə Azərbaycan tərəfi yeni azad edilmiş mövqelərə apardığı ehtimal olunan 5 yeni yol çəkib. Əvvəllər bu sahədə mövqelərarası genişlik məsafəsi 4.5-5 km olub. Hazırda isə Ermənistan və Azərbaycan mövqeləri arasındakı uzaqlıq məsafəsi 750-1600 metrədək qısalıb.
Qeyd edək ki, erməni mövqeləri məhz tərk edilmiş Günnüt kəndi ərazisində yerləşir. Bu sahədə mühəndis işlərinin aparılması üzrə əlamətlər 2-17 may tarixlərinə təsaduf etsə də, əsas mühəndis işlərinin 17-27 may tarixlərində həyata keçirildiyi iddia edilir.
Erməni tərəfinin iddiasına görə, 17 may tarixindən sonra mühəndis işləri aparılmağa başlayıb. Arpa (Areni) kəndi istiqamətində şərqə doğru yeni yol açaraq, iki erməni mövqeyi arasında olan yüksəklikdə mövqe tuturuq.
17 may tarixindən sonra işğalçı ordunun mövqelərinə ən yaxın məsafə 750 metr, Arpa kəndinin meyvə bağlarından isə təqribən 2000 metr məsafədə olmaqla, su anbarının cənub istiqamətində yerləşən ərazilər azad edilərək yeni mövqe qurulub.
