Menu
Geri İrəli

Futbolçumuz soyadını niyə dəyişib? – MÜSAHİBƏ

Müəllif: sumqayitxeber.com • Tarix: 24 İyul 2013 • Baxış sayı: 243 dəfə • Şərh yoxdur

Milli komandamızın və Ruminiyanın “Petrolul” klubunun üzvü Elhad Nəziri ilə bağlı xoşagəlməz söhbətlərin yayılması bizi müdafiəçi ilə əlaqə saxlamağa sövq etdi. Elhad Nəziri ilə müsahibə zamanı həm haqqında yayılan “lipa” məsələsinə, həm də karyerası ilə bağlı digər maraqlı məqamlara aydınlıq gətirməyə çalışdıq.

-“Petrolul”da işlərin necə gedir? 

- Hər şey qaydasındadır. Ruminiya çempionatında son iki oyunda qələbə qazanmışıq. Üstəlik, Avroliqadakı qarşılaşmadan da qalib ayrılmışıq. Ən əsası da artıq həm Ruminiya çempionatında, həm də Avropa Liqasında debüt etmişəm.

- Bir müddət əvvəl komandadan qovulduğun yönündə xəbərlər yayılsa da, klubda qaldın. Bu məsələyə aydınlıq gətirməyini istərdik. 

- Düzü, bu barədə mən özüm də mətbuatdan məlumat almışam. Əslində isə belə bir şey yox idi. Mənim “Petrolul”la üç illik müqaviləm var. Əgər mən komandaya lazım olmasam, mənimlə üç illik müqavilə bağlamazdılar.

- Ötən mövsüm cəmi bir qarşılaşmada forma geydin. Yeni mövsümdə də ehtiyatda qalmaqdan qorxmursan ki? 

- Mənim cəmi 20 yaşım var və öz vaxtımı gözləməkdə idim. Artıq yeni mövsümdə oynamaq şansı qazanmışam. İnşallah, hər şey belə davam edər.

- Komandadakı gələcək taleyiniz barədə baş məşqçi Kosmin Kontra ilə söhbətiniz olubmu? 

- Bəli, bu haqda baş məşqçi ilə söhbətimiz oldu və Kontra mənim komandada qalmağımı istədi. Ona görə də bu mövsümdə də Ruminiya klubunda forma geyəcəm.

- Necə düşünürsən, komandanın əsas heyətinə düşməməyində haqqında yayılan “lipa” məsələsinin təsiri ola bilərmi? 

- Mən bu suala cavab vermək istəmirəm. Ümumiyyətlə, bu haqda heç vaxt mətbuata açıqlama verməyi düşünmürəm.

(2005-ci ildə “Qarabağ”ın ikinci komandasında çıxış edən Elhad, Əhmədov soyadı ilə təqdim olunsa da, sonradan legioner həyatı yaşayanda Nəziri kimi çıxış etməyə başladı. Bundan başqa, “Qarabağ”da olarkən təvəllüdü 1990-cı il göstərilən Elhad daha sonra 1992-ci ildən anadan olmuş kimi təqdim olundu. Daha bir məqam isə budur ki, çimərlik futbolunda çıxış edərkən artıq Nəziriyə çevirilmiş Elhad çimərlik yığmamızın heyətində Əhmədov soyadı ilə oynayır) 

- “Lipa” məsələsi barədə danışmaq istəməməyin haqqında deyilənlərin həqiqət olmasını düşünməyə əsas verir. Maraqlıdı, Elhad Əhmədov kimi tanıdığımız futbolçu necə oldu ki, Nəziriyə çevrildi? 

- Mən bu barədə yetərincə danışmışam. Xahiş edirəm, başqa mövzuda danışaq, çünki mənim bu barədə danışmağım əsassız söhbətlərin yayılmasına şərait yaradır.

- Hər halda, məsələ Ruminiya mətbuatında da geniş əks-səda doğurmuşdu. Bu məsələdən sonra klubda sənə qarşı münasibət necə oldu? 

- “Petrolul” komandasında çalışanlar futbolu bilən adamlardır. Ona görə də mənə qarşı münasibət dəyişmədi. Komanda üçün əsas olan mənim sərgilədiyim oyundur.

- Ruminiyada forma geymək sənə nə qazandırdı? 

- Bu ölkədə legioner həyatı yaşamaq həyatımda önəmli hadisədir. Ruminiya kubokunu qazandım. Çempionatın bürünc medalını qazandım və Avropada medal qazanan ilk azərbaycanlı futbolçu kimi tarixə düşməyim mənim üçün önəmli idi.

- Deyəsən, sənə qədər Nazim Süleymanovun Rusiya çempionu olmasını, Vəli Qasımovun isə İspaniya La-Liqasının bürünc mükafatını qazanmasını unutmusan. Başqa sözlə legioner kimi çempionatın mükafatçısı olan ilk azərbaycanlılar məhz onlardır. 

- Məndə olan məlumat belədir. Mənim Nazim Süleymanov və Vəli Qasımovun karyerasını müzakirə predmetinə çevirməyim mümkün deyil. Futbolçu kimi onların səviyyəsinə gəlməyimə çox var.

- Ruminiya çempionatı ilə Azərbaycan Premyer-liqasını müqayisə edə bilərsənmi? 

- İki ölkə futbolunun oxşar cəhətlərinin olduğunu düşünmürəm. Fərqli tərəflərə gəlincə, Ruminiya futbolunun Hacı, Kosmin Kontra, Adrian Mutu, Kristian Çivu kimi ulduzlar yetişdirməsi önəmli fərqdir. Bizdə isə bu səviyyədə oyunçular yoxdur.

- Milli komandaya səni ilk dəfə Berti Foqts dəvət edib. Alman mütəxəssisin ilin sonunda yığmadan ayrılmaq ehtimalını necə qarşıladın? 

- Mənim Berti Foqtsun milli komandadan ayrılması ilə bağlı yayılan söyləntilərdən xəbərim yoxdur. Ona görə də bu haqda düşünməmişəm.

- Ümumiyyətlə, milli komandamızda yerli, yoxsa əcnəbi mütəxəssisin çalışmasının tərəfdarısan? 

- Bu məsələni müzakirə etmək mənim işim deyil. AFFA-dan kimi məsləhət bilsələr, həmin məşqçi də bu postu tutacaq.

Tural Məmmədov
AzVision.az üçün

Facebook Şərhləndirmə:

Şərhinizi yazın