«Azərikimya» İstehsalat Birliyinin «Kimyaçı» Mədəniyyət sarayının kollektivi Novruz bayramı günlərində Vətənimizin müdafiəçilərinin yanında olmaq, onların bayramını daha da şənləndirmək, sevinclərini artırmaq məqsədilə «N» saylı hərbi hissənin qospitalında əsgərlər qarşısında böyük konsert proqramı ilə çıxış etmişdir.
Yazın ilıq nəfəsinin yenicə duyulmağa başlanıldığı bir gündə keçirilən bayram tədbiri ARDNŞ-in «Azərikimya» rəhbərliyinin əsgər və zabitlərə Novruz və Qələbə arzulu təbriki ilə başlamışdır.
«Kimyaçı» Mədəniyyət sarayının bədii özfəaliyyət kollektivləri açıq səma altında təşkil olunmuş geniş tədbirdə əsgərlər üçün bayram ovqatlı mahnılarla yanaşı xalqımızın son illər daha böyük dəyər verdiyi klassik muğam nümunələri, aşıq mahnıları ifa etmiş, Vətən və torpağın müqəddəsliyi ilə bağlı və Qələbə ruhlu şeirlər səsləndirmişlər.
Yazın-baharın gözəllik, yaşıllıq simvolu olan Bahar qızın məclisə qədəm qoyması əsgərlərdə bayram sevinci yaratmış, Novruz bayramının daimi və ən sevimli, maraqlı personajları olan Kosa və Keçəlin meydanda görünməsi, onların duzlu-yumorlu, məzhəkəli dialoqları gənc hərbçilərə xoş ovqat bəxş etmişdir.
İstedadlı körpə rəqqasların – 5 yaşlı Eyyubun və Ləmanın təcrübəli rəqqaslara məxsus ustalıq və koloritlə ifa etdikləri melodik Azərbaycan xalq rəqsləri əsgərlər və zabitlər tərəfindən sürəkli alqışlarla qarşılanmışdır.
Üç saatdan artıq davam etmiş geniş konsert proqramı son illərin populyar əsgər mahnıları və marşları, bütün əsgər və zabitlərin qol-qola tutaraq oynadıqları «Yallı» rəqsi ilə başa çatmışdır.