Menu
Geri İrəli

Sumqayıtda müasir metallurgiya kompleksinin inşasına dair saziş imzalanıb

Müəllif: sumqayitxeber.com • Tarix: 21 Dekabr 2016 • Baxış sayı: 836 dəfə • 2 şərh

14822214385930558361_1000x669
Azərbaycanın “Baku Steel Company” və İtaliyanın “Danieli” şirkətləri arasında müasir metallurgiya kompleksinin tikintisinə dair saziş imzalanıb.

AZƏRTAC xəbər verir ki, Sumqayıt şəhərində müasir metallurgiya kompleksinin tikintisinə dair saziş dekabrın 20-də Bakıda imzalanıb.

Sazişdə dəyəri 1 milyard 225 milyon avro olan dəmir konsentratından başlayaraq hazır polad təbəqələrinin istehsalını əhatə edən 5 müasir metallurgiya zavodunun tikilməsi nəzərdə tutulur. Kompleksin tikintisi zamanı 4000-ə yaxın, müəssisə fəaliyyətə başladıqdan sonra isə 1200 nəfər işlə təmin olunacaq. Bu kompleksin tikintisi metallurgiya sənayesi sahəsində müxtəlif çeşiddə məhsulların istehsalının genişləndirilməsinə və ölkənin ixrac potensialının artırılmasına töhfə verəcək.

Sazişin imzalanması “Metallurgiya sənayesinin inkişafı: Yeni çağırışlar və hədəflər” mövzusunda keçirilən tədbir çərçivəsində baş tutub.

“Metallurgiya sənayesinin inkişafı: Yeni çağırışlar və hədəflər” mövzusunda keçirilən tədbirdə sənaye sahəsində fəaliyyət göstərən 50-yə yaxın sahibkar iştirak edib.

İqtisadiyyat naziri Şahin Mustafayev qeyri-neft sektorunun inkişafının Azərbaycan Respublikası Prezidentinin iqtisadi siyasətinin prioritet istiqaməti olduğunu, bu sahənin şaxələndirilməsi istiqamətində mühüm işlərin görüldüyünü və 2016-cı ilin 11 ayı ərzində qeyri-neft sənayesinin 5 faiz artdığını qeyd edib.

Sənayenin modernləşdirilməsi, qeyri-neft sənayesinin diversifikasiyası ilə bağlı sistemli tədbirlərin həyata keçirildiyini vurğulayan nazir Şahin Mustafayev bu sahədə proqram xarakterli sənədlərin qəbul olunduğunu, yeni qanunvericilik bazasının formalaşdırıldığını, biznes və investisiya mühitinin yaxşılaşdırılması, sahibkarlıq fəaliyyətinin dəstəklənməsi ilə bağlı islahatların davam etdirildiyini və təşviq mexanizmlərinin tətbiqinə başlanıldığını qeyd edib. Diqqətə çatdırılıb ki, bu ilin may ayından indiyədək sahibkarlara 84 investisiya təşviqi sənədi verilib ki, bu layihələrin 50 faizi sənaye sahəsinə aiddir. Bu layihələr çərçivəsində yerli istehsala 1 milyard manatdan çox investisiya yatırılacaq və 6 mindən çox iş yeri açılacaq.

14822268624768238370_1000x669

Qeyri-neft sektorunun inkişafının dəstəklənməsinin zəruriliyini qeyd edən nazir Şahin Mustafayev sənaye parklarının və zonalarının, o cümlədən Sumqayıt Kimya, Balaxanı, Qaradağ, Mingəçevir və Pirallahı sənaye parkları, eləcə də Neftçala və Masallı sənaye zonalarında müasir tələblərə cavab verən sənaye müəssisələrinin təşkili üçün yaradılmış əlverişli imkanlar barədə məlumat verib. Qeyd olunub ki, hazırda təkcə Sumqayıt Kimya Sənaye Parkında rezidentlər tərəfindən 9 müəssisə yaradılır və onların bir neçəsi 2017-ci ildə fəaliyyətə başlayacaq. “Bakı Əlvan Metallar və Ferroərintilər Şirkəti” də SKSP-nın rezidentlərindəndir və hazırda sənaye parkında ferroərintilər zavodu inşa edir. Zavod 2018-ci ildə istifadəyə veriləcək.

Şahin Mustafayev Azərbaycanda metallurgiya sənayesinin tarixi ənənələrinin mövcud olduğunu, “Azərbaycan Respublikasında sənayenin inkişafına dair 2015-2020-ci illər üçün Dövlət Proqramı”nda, eləcə də “Azərbaycan Respublikasında ağır sənaye və maşınqayırmanın inkişafına dair Strateji Yol Xəritəsi”ndə bu sahənin əsas prioritetlərdən biri kimi müəyyən edildiyini vurğulayıb. Metallurgiya sənayesinin inkişafı məqsədilə Azərbaycan Respublikası Prezidentinin müvafiq Sərəncamına uyğun olaraq, ölkənin metallurgiya kompleksində sağlamlaşdırma və restrukturizasiya tədbirlərinin həyata keçirilməsi, bu sahəyə investisiyaların cəlb edilməsi məqsədilə “Daşkəsən Filizsaflaşdırma” ASC-nin özəlləşdirilməsi istiqamətində zəruri işlər görülür.

Şahin Mustafayev, həmçinin qeyd edib ki, Sumqayıtda tikiləcək investisiya dəyəri 1 milyard avrodan çox olan metallurgiya kompleksi yeni iş yerlərinin açılmasında, bu sahədə idxaldan asılılığın azalmasında və ixracın genişləndirilməsində əhəmiyyətli olacaq. Tikinti işləri 3 ilə yekunlaşacaq. SKSP-də fəaliyyət göstərəcək Peşə Tədris Mərkəzi yaradılacaq metallurgiya kompleksi üçün də kadr hazırlaya bilər. Yeni tikiləcək kompleksdə istehsal olunacaq məhsulların yarıdan çoxu ixracyönümlü olacaq. Bu məhsullar Azərbaycandakı tələbatı tam ödəyəcək.

1482226862636811816_1000x669

İtaliyanın “Danieli” şirkətinin İdarə Heyətinin rəhbəri və baş icraçı direktoru Gianpietro Benedetti Azərbaycanda əlverişli biznes mühitinin olduğunu, xarici investorlar üçün əlverişli şəraitin yaradıldığını bildirib, son zamanlar sahibkarlıq sahəsində aparılan islahatları yüksək qiymətləndirib. Gianpietro Benedetti metallurgiya kompleksi barədə məlumat verərək bildirib ki, bu layihələrin həyata keçirilməsi nəticəsində Sumqayıtda 5 metallurgiya zavodunu özündə birləşdirən metallurgiya klasteri yaranacaq. Klasterin yaranması Azərbaycanda metallurgiyanın xammaldan tutmuş müxtəlif çeşidli ən son məhsullara qədər istehsal zəncirinin yaranmasını təmin edəcək. Gianpietro Benedetti yeni nəsil texnologiyaları əsasında inşa ediləcək kompleksin unikal layihə olduğunu, xərclər və keyfiyyət baxımından səmərəliliyini qeyd edib.

“Baku Steel Company” MMC-nin baş direktorunun müavini Ramin Kərimov metallurgiya kompleksinə daxil olacaq zavodlar barədə təqdimatla çıxış edib. Ramin Kərimov, həmçinin təmsil etdiyi qurum barədə məlumat verərək istehsal gücü 1 milyon ton olan poladəritmə zavodunda müasir istehsal sahələrinin yaradıldığını və hazırda azkarbonlu poladdan yüksək keyfiyyətli metal məmulatlarının istehsal edildiyini diqqətə çatdırıb. İstehsal edilən məhsullar daxili bazarla yanaşı, Gürcüstan, İran, Qazaxıstan, Rusiya və digər ölkələrə ixrac edilir.

 

Facebook Şərhləndirmə:

“Sumqayıtda müasir metallurgiya kompleksinin inşasına dair saziş imzalanıb” yazısına 2 cavab

  1. Adil deyir:

    İlk növbədə Sumqayıt Boru yayma zavodunu bərpa etmək lazım idi
    Hansı ki, neft -qaz boruları istehsal edirdi və 36 xarici ölkəyə ixrac edirdi
    Bu həm özümüzün neft qaz hasilatında xaricdən alınmasına ehtiyac olmazdı
    həm əlavə valyuta ölkəmizə daxil olardı
    həm də 10 min iş yeri olardı
    Zavodun Xam malı da Daşkəsən filiz mədəni.
    Xam malı almaq üçün əlavə daşkəsəndə iş yerləri olardı, Sadəcə orada bir Domna peçi tikmək lazımdır ki,
    bu peç vasitəsilə torpaqdan dəmir filizini ayıran zavod, hansı ki, Gürcüstanın Rustavi şəhərində var
    məhv etdilər………..
    Sintez kauçuk zavodu – avtomobil təkəri buraxa bilməz?
    Azərbaycanda 1 mln dan artıq maşın var
    təkərləri isə Koreya, Almaniya, Cindən alırıq
    Olmazmı ki, özümüz bu avadanlıqları gətirib, SK zavodunda istehsal edək?
    və əlavə valyuta əldə etmək deyilmi?

  2. Adil deyir:

    Cox sadalamaq olar, sadəcə nə istehsal olunacaqsa il növbədə
    müasir avadanlıq və keyfiyyətli mal istehsal etmək lazımdır ki, müştəri tələbatı olsun

Şərhinizi yazın