Sumqayıt Dövlət Universitetinin İqtisadiyyat və idarəetmə fakültəsinə yeni dekan seçilib. Bu vəzifəyə Loğman İmran oğlu Abdullayev təyin olunub. O, ali təhsilli iqtisadçı-riyaziyyatçı olmaqla yanaşı, uzun illər tədris və elmi-tədqiqat sahəsində zəngin təcrübəyə malikdir.
Loğman Abdullayev 18 noyabr 1972-ci ildə Sumqayıt şəhərində müəllim ailəsində anadan olub. 1990-1995-ci illərdə Azərbaycan Dövlət İqtisad Universitetində iqtisadi kibernetika ixtisası üzrə ali təhsil alaraq iqtisadçı-riyaziyyatçı ixtisasına yiyələnmişdir.
Loğman Abdullayev 2005-ci ildə “İstehlak bazarı və onun tənzimlənməsi problemi” mövzusunda namizədlik dissertasiyasını müdafiə edərək iqtisad elmləri namizədi elmi dərəcəsini almış, 2012-ci ildə isə dosent elmi adına layiq görülmüşdür. 2018-2023-cü illərdə Sumqayıt Dövlət Universitetində elmlər doktoru proqramı üzrə dissertant olmuş və “Azərbaycanda insan kapitalından istifadənin səmərəliliyinin artırılması istiqamətləri” mövzusunda tədqiqat aparmışdır.
Loğman Abdullayev beynəlxalq təcrübə proqramlarında iştirak etmişdir. O, 2018-ci ildə Vyana Tətbiqi Elmlər Universitetində (Avstriya) və Valensiya Politexnik Universitetində (İspaniya) təlimlərdə və beynəlxalq konfranslarda iştirak etmiş, 2019-cu ildə Sankt-Peterburq Dövlət İqtisad Universitetində ixtisasartırma kursunu uğurla başa vurmuşdur. 2024-cü ilin oktyabr ayında London Maliyyə Menecerləri İnstitutunun (İCFM) təlimlərini uğurla keçərək beynəlxalq diplom əldə etmişdir.
O, 2 dərs vəsaiti, 1 monoqrafiya, 1 metodiki göstəriş, 16 fənn proqramı, 68 məqalə və tezisin müəllifidir. Loğman Abdullayev həmçinin beynəlxalq sertifikatlara malikdir və maliyyə uçotu sahəsində təlimlər aparır.
Müzakirə qapadılmışdır.