Sumqayıt Dövlət Universiteti beynəlxalq əməkdaşlıq sahəsində yeni uğurlara imza atır
Sumqayıt Dövlət Universiteti (SDU) beynəlxalq əməkdaşlıq sahəsində əhəmiyyətli addımlar atmağa davam edir. Son həftələrdə SDU-nun rektoru Rüfət Əzizovun rəhbərlik etdiyi nümayəndə heyəti Özbəkistan və Qazaxıstanın bir sıra nüfuzlu ali təhsil müəssisələrinə səfər edərək universitetlərarası əlaqələrin genişləndirilməsi istiqamətində mühüm görüşlər keçirib. Bu səfərlər çərçivəsində bir sıra əməkdaşlıq memorandumları da imzalanıb.
SDU ilə İslam Kərimov adına Daşkənd Dövlət Texniki Universiteti arasında əməkdaşlıq memorandumu
6 noyabr 2024-cü il tarixində Sumqayıt Dövlət Universitetinin nümayəndə heyəti Özbəkistanın İslam Kərimov adına Daşkənd Dövlət Texniki Universitetinə səfər edib. Görüş zamanı elm, təhsil, elmi-tədqiqat, birgə layihələr, konfranslar, seminarlar və təlimlər, professor, müəllim və tələbə mübadiləsi kimi istiqamətlərdə əməkdaşlıq imkanları müzakirə edilib. Sonda iki universitet arasında əməkdaşlıq haqqında memorandum imzalanıb.
Daşkənd Dövlət İqtisad Universiteti ilə əməkdaşlıq memorandumu
SDU nümayəndə heyəti səfər çərçivəsində Daşkənd Dövlət İqtisad Universitetini də ziyarət edib. Görüşdə təhsil və elm-tədqiqat sahəsində birgə elmi araşdırmaların aparılması, nəticələrin beynəlxalq jurnallarda çap edilməsi, müəllim və tələbə mübadiləsi, eləcə də ixtisasartırma proqramları ətrafında müzakirələr aparılıb. Tərəflər arasında əməkdaşlıq haqqında daha bir memorandum imzalanıb.
Əl-Xarəzmi adına Daşkənd İnformasiya Texnologiyaları Universiteti ilə Anlaşma Memorandumu
Özbəkistan səfəri çərçivəsində SDU Əl-Xarəzmi adına Daşkənd İnformasiya Texnologiyaları Universiteti ilə də əməkdaşlıq əlaqələri qurub. Universitet rəhbərliyi ilə görüş zamanı təhsildə innovativ layihələrin dəstəklənməsi, universitet-sənaye əməkdaşlığı, elmi-tədqiqat layihələri və mübadilə proqramları müzakirə olunub. Görüşün sonunda əməkdaşlıq haqqında Anlaşma Memorandumu imzalanıb.
Almatı Menecment Universiteti ilə perspektivli əməkdaşlıq müzakirə edilib
SDU-nun nümayəndə heyəti Qazaxıstana səfər çərçivəsində Almatı Menecment Universitetində (AlmaU) olub. AlmaU-nun rəhbərliyi ilə keçirilən görüşdə iqtisadi sahələrdə birgə tədqiqatlar, ixtisasartırma proqramları və müəllim-tələbə mobilliyi layihələri müzakirə edilib. AlmaU ilə əməkdaşlığın SDU Biznes Məktəbinin inkişafına müsbət təsir göstərəcəyi xüsusi vurğulanıb.
Abay adına Qazax Milli Pedaqoji Universiteti ilə yeni əlaqələr qurulur
4 noyabr 2024-cü ildə SDU nümayəndə heyəti Abay adına Qazax Milli Pedaqoji Universitetində görüş keçirib. Görüşdə tələbə və müəllimlərin bacarıqlarının artırılması, akademik mobillik proqramlarının genişləndirilməsi və birgə elmi layihələrin həyata keçirilməsi müzakirə edilib. SDU rektoru Rüfət Əzizov beynəlxalq əməkdaşlığın əhəmiyyətini vurğulayaraq qloballaşma şəraitində tələbələr üçün geniş imkanlar yaratmağın vacibliyini diqqətə çatdırıb.
Bu görüşlər və imzalanan memorandumlar SDU-nun beynəlxalq əlaqələrini möhkəmləndirərək təhsil və elmi araşdırmalar sahəsində yeni imkanlar açır, qlobal səviyyədə universitetin nüfuzunu artırır.
Müzakirə qapadılmışdır.