Son 10 ilin ən böyük layihələrindən biri
Heç şübhəsiz ki, son 10 il ərzində Sumqayıt şəhərində həyata keçirilən ən önəmli layihələrdən biri Sumqayıt Bulvarının yaradılmasıdır. Bu layihə şəhərin inkişaf konsepsiyasının əsas tərkib hissəsinə çevrilmiş, həm şəhər sakinlərinin, həm də ölkə rəhbərliyinin arzusunu reallığa çevirmişdir.
Prezident İlham Əliyevin MÖCÜZƏ adlandırdığı layihə
2016-cı il sentyabrın 27-də Prezident İlham Əliyev Sumqayıtda ictimaiyyətlə görüşündə bulvarın istifadəyə verilməsini “möcüzə” adlandıraraq bu fikirləri səsləndirmişdi: “Sumqayıt bulvarı isə hesab edirəm ki, bir möcüzədir… Mən çox istəyirdim ki, Sumqayıtda Bakı bulvarına bənzər bir bulvar olsun. Bu gün biz buna nail olduq.” Bu sözlər bulvarın yalnız bir şəhərsalma layihəsi deyil, həm də böyük bir arzu və strateji məqsədin gerçəkləşməsi olduğunu göstərir.
Sovet dövrünün sənaye şəhərindən ekoloji şəhərə
Bir vaxtlar “kimya sənayesinin mərkəzi” kimi tanınan Sumqayıtın dənizkənarı əraziləri baxımsız vəziyyətdə idi. Çirkli sənaye tullantıları, abadlıqdan uzaq mənzərə şəhərin simasına mənfi təsir göstərirdi. 2015-ci ildən etibarən aparılan kompleks tədbirlər nəticəsində isə bu ərazilər müasir bulvara çevrilərək ekoloji tarazlığın bərpasına, şəhərin imicinin dəyişməsinə xidmət etdi.
Yeni yaşayış massivlərinin salınması
Bulvarın salınması şəhərin görkəmini dəyişməklə yanaşı, ətraf ərazilərdə yeni yaşayış massivlərinin salınmasını da stimullaşdırdı. Son 10 ildə Sumqayıtın dənizkənarı zonasında müasir binalar, yeni məhəllələr tikildi, bu da şəhərin demoqrafik və sosial inkişafına təkan verdi.
Yerli və xarici turistlərin sevimli ünvanı
Sumqayıt Bulvarı qısa zamanda təkcə şəhər sakinlərinin deyil, həm də ölkənin müxtəlif bölgələrindən gələn qonaqların sevimli istirahət məkana çevrildi. Xarici turistlərin də diqqətini cəlb edən bulvar müasir infrastrukturu, təmizliyi və gözəl dəniz mənzərəsi ilə ölkənin turizm xəritəsində mühüm yer tutur.
Bulvarın salınması məşğulluğun artmasına səbəb oldu
Bulvarın tikintisi və sonrakı fəaliyyəti yüzlərlə yeni iş yerinin açılmasına səbəb oldu. İctimai iaşə obyektləri, istirahət mərkəzləri, xidmət sahələri və texniki infrastrukturda çalışan yüzlərlə insan buradan dolanışıq tapdı. Bu da Sumqayıtın sosial-iqtisadi inkişafında mühüm rol oynadı.
Yaşıllıq və ekoloji tarazlıq təmin olundu
2016-cı ildən başlayaraq bulvar ərazisində yüz minlərlə ağac və dekorativ kollar əkildi. Müasir yaşıllaşdırma layihələri sayəsində Sumqayıtın dənizkənarı zolağı ekoloji baxımdan təmizlənərək şəhərin “yaşıl ürəyinə” çevrildi. Bu addım həm şəhərin havasının sağlamlaşdırılmasına, həm də ətraf mühitin mühafizəsinə böyük töhfə verdi.
Asudə vaxt və istirahət üçün yeni imkanlar yarandı
Bulvar boyu əyləncə mərkəzləri, idman meydançaları, velosiped yolları, hər yaş qrupundan insanlar üçün rahatlıq yaratdı. Gənclər üçün idman və əyləncə, uşaqlar üçün oyun sahələri, yaşlılar üçün sakit istirahət guşələri nəzərdə tutuldu.
Sumqayıt Bulvarı həm də mədəniyyət mərkəzi kimi tanınır
Sumqayıt Bulvarı bu gün yalnız dənizkənarı istirahət zonası kimi deyil, həm də şəhərin əsas mədəniyyət mərkəzlərindən biri kimi tanınır. Burada fəaliyyət göstərən Bayraq Muzeyi və Muğam Mərkəzi yerli sakinlər və şəhər qonaqları üçün xüsusi maraq kəsb edir. Müasir infrastruktura malik bu məkanlar müxtəlif mədəni tədbirlərə, konsertlərə və sərgilərə ev sahibliyi etməklə, Sumqayıtın mədəni həyatına yeni nəfəs gətirir.
Sumqayıt Beynəlxalq tədbirlərə ev sahibliyi etməyə başladı
Son illərdə Sumqayıt Bulvarı beynəlxalq tədbirlərə, kütləvi idman yarışlarına ev sahibliyi edir. Burada təşkil olunan tədbirlər şəhərin beynəlxalq imicini gücləndirir.
Gələcəyə inam və inkişafın rəmzi
Sumqayıt Bulvarı gözəl bir şəhərsalma layihəsi olmaqla yanaşı, həm də Azərbaycanın inkişaf strategiyasının bariz nümunəsidir. Bu möhtəşəm kompleks həm Ulu Öndər Heydər Əliyevin, həm də Prezident İlham Əliyevin arzularının reallaşmasının göstəricisi olaraq Sumqayıtın simvoluna çevrilib.
Beləliklə, əminliklə deyə bilərik ki, son 10 ildə Sumqayıt şəhərinin inkişafında ən mühüm dönüş nöqtələrindən biri məhz Sumqayıt Bulvarının salınmasıdır. Möcüzə adlandırılan bu layihə şəhərin iqtisadi, sosial, ekoloji və turizm potensialını gücləndirməklə yanaşı, həm də gələcəyə inamın, şəhərin yenilənən simasının rəmzinə çevrilmişdir.
Müzakirə qapadılmışdır.