Sumqayıt şəhərində yerləşən 23 nömrəli tam orta məktəbin 1 “f” sinif şagirdləri üçün maraqlı və maarifləndirici ekskursiya təşkil olunub.
Sumqayitxeber.com xəbər verir ki, Abşeron-Xızı Regional Təhsil İdarəsinin tabeliyində olan 23 nömrəli tam orta məktəbin ibtidai sinif müəllimi Günay Əhmədovanın təşkilatçılığı ilə həyata keçirilən ekskursiya Sumqayıt şəhər Tarix Muzeyində baş tutub.
Ekskursiyanın məqsədi şagirdlərə doğma şəhərlərinin tarixi haqqında əyani və maraqlı şəkildə məlumat vermək, onlarda tarixə və mədəni irsə maraq oyatmaq olub.
Muzeydə balacaları ekskursiyaçı Nərmin Kərimli qarşılayıb. O, uşaqlara muzeyin ekspozisiyasında yer alan eksponatlar, Sumqayıtın yaranma tarixi, qədim insan izləri, sənaye inkişafı və şəhərin müxtəlif inkişaf mərhələləri haqqında sadə və anlaşıqlı dildə məlumat verib. Tarixi əşyalar, fotoşəkillər və sənədlər şagirdlərin xüsusi marağına səbəb olub.
Ekskursiya zamanı uşaqlar aktiv iştirak edib, maraqlı suallar veriblər. Onların təəccüblü baxışları və səfərdən aldıqları zövq müəllim və muzey əməkdaşları tərəfindən məmnunluqla qarşılanıb. Sinif rəhbəri Günay Əhmədova bildirib ki, bu cür ekskursiyalar şagirdlərin dünyagörüşünün formalaşmasında, vətənə və doğma şəhərə bağlılıq hissinin güclənməsində mühüm rol oynayır.
Ekskursiyanın sonunda şagirdlər muzeydə qazandıqları təəssüratları bölüşərək bu səfəri həm əyləncəli, həm də maarifləndirici bir gün kimi yadda saxladıqlarını bildiriblər.
Belə təşəbbüslərin davamlılığı gələcək nəsillərin milli irsimizə sahib çıxan, məlumatlı və vətənpərvər fərdlər kimi yetişməsinə töhfə verir.
Müzakirə qapadılmışdır.