Azərbaycan Milli Elmlər Akademiyasının Nizami Gəncəvi adına Ədəbiyyat İnstitutunun dəvəti ilə ölkəmizdə qonaq olan Özbəkistandan gələn professor və müəllim heyəti həm də Sumqayıt şəhərində Əli Kərim adına poeziya evində şəhərin ədəbi ictimaiyyətinin üzvləri ilə görüş keçiriblər.
Əli Kərim adına Sumqayıt Poeziya evinin direktoru, şair İbrahim İlyaslı qonaqları salamlayaraq, Azərbaycan –Özbəkistan ədəbi əlaqələrinin qədim köklərindən, ortaq dilimizdən və bu dili və dostluğu zaman-zaman qoruyan Özbəkistanın və Azərbaycanın ədəbiyyat xadimlərinin bu yolda göstərdiyi xidmətlərdən danışıblar.
Tanınmış şairə, “Şöhrət” ordenli Ofelya Babayeva öz çıxışında bu gün türkdilli ölkələrin ədəbiyyat, incəsənət xadimlərinin və siyasi liderlərinin görüşməsinin əhəmiyyətini qeyd edərək deyib: “Azərbaycan Prezidenti İlham Əliyev Özbəkistana sonuncu rəsmi səfəri zamanı Özbəkistan Prezidenti Şavkat Mirziyoyevlə tərcüməçi olmadan danışmağı təklif etdisə, bu artıq Türk Dövləti Təşkilatlarının yaxın zamanlarda öz istək və arzularını yerinə yetirəcəklərinə verilmiş ciddi mesajdır. Biz də öz ədəbi əlaqələrimizlə böyük ədiblərimiz kimi töhfələr verməliyik”.
Özbəkistanın böyük klassik şairi Əlişir Nəvainin irsinin araşdıran AMEA Nizami Gəncəvi adına Ədəbiyyat İnstitutunun “Azərbaycan-Türkmənistan – Özbəkistan ədəbi əlaqələr” şöbəsinin müdiri, filologiya elmləri doktoru Almaz Ülvi Binnətova bildirdi ki, iki qardaş dövlət başçısının görüşündən sonra o da bir alim kimi Özbəkistanın “Dostluq” ordeninə layiq görülüb. Türkdilli xalqların ədəbiyyatı, ədəbi əlaqələri, ədəbi təsiri və türkdilli xalqların ədəbi əsərlərinin uyğun dilə çevrilməsi hər zaman rəhbərlik etdiyi şöbədə gözəl nəticələr verib. Bu gün yetişən gənc alimlər türkdilli ədəbiyyatların araşdırılması yolunda böyük maraq göstərirlər. Özbəkistandan gələn professor və müəllim heyəti də Azərbaycanın elm mərkəzləri ilə hər zaman birgə işləyiblər.
Özbəkistandan konfransa gələn professor və müəllim heyətinin rəhbəri Mikumi adına Kokand Dövlət Universitetinin Pedaqoji İnstitutunun filologiya kafedrasının müdiri Ziba Qabilova Azərbaycan və Özbəkistan ədəbi əlaqələrinin yeni müstəvidə bərpasının iki ölkənin elm mərkəzlərində türk dünyasında görüləcək böyük axtarışlardan və tapıntılardan xəbər verdiyini bildirib: “Bizim ədəbiyyatlarımız, ədəbi irsimiz o qədər zəngindir ki, burada yazılan hər fikir türk dünyasının birləşməyi üçün çox mühümdür. Biz inanırıq ki, bundan sonra da elmi araşdırmalarımıza cəlb etdiyimiz gənc alimlər də bu sahədə yeni töhfələrini verəcəklər”.
Görüşdə iştirak edən Özbəkistanın Əlişir Nəvai adına Daşkənd Dövlət Özbək Dili və Ədəbiyyatı Universitetinin kafedra müdiri, filologiya elmləri doktoru, professor Nurbay Cabbar Azərbaycanla Özbəkistanı birləşdirən Nizami Gəncəvi və Əlişir Nəvai irsindən, Əlişir Nəvainin türk dilində yazıb qoyduğu ədəbi irsi ilə dilimizin necə böyük və mənalı olduğunu göstərdiyini diqqətə gətirib. Daha sonra isə Azərbaycan haqqında yazdığı şeirini oxuyub, çıxışının sonunda deyib ki, əgər dünyada Azərbaycan adlı diyar olmasaydı, dünya öz gözəl mənzərəsini itirərdi.
Əli Kərim adına Poeziya Evindəki görüşdə özbəkistanlı qonaqlar professor Dilşad Qayıbov, Gülsənəm Norova, gənc tədqiqatçı Urqenc Dövlət Universitetinin müəllimi Moyibə Atamuradova, tənqidçi şair, gənc tədqiqatçı Ölməzbəy Xocayev də öz şeirlərini oxumaqla Azərbaycanın Vətən müharibəsində qazandığı böyük Zəfərindən danışdılar. Özbək dilindən Azərbaycan dilinə ədəbi nümunələr və şeirləri tərcümə edən Süleyman Hüseynov, Şahməmməd Dağlaroğlu da tərcümə etdikləri ədəbi əsərlər haqqında, eləcə də Özbəkistanda çap olunmuş müəllifləri olduqları əsərlərdən danışdılar.
Görüşün sonunda qonaqlara poeziya evinin təsis etdiyi “Sumqayıtın Fəxri Qonağı” sertifikatı hədiyyə olunub.
Sonra Özbəkistandan gəlmiş nümayəndə heyəti Sumqayıt şəhəri ilə tanış oldular və Şəhidlər xiyabanını ziyarət ediblər.
Müzakirə qapadılmışdır.