Sfera.az bildirir ki, Publika.az-a danışan Rasif Həbibovun qardaşı Vasif Həbibov onun bir neçə gün əvvəl vəfat etdiyini deyərək hadisənin şok təfərrüatından danışıb. O, qardaşının telefonun enerji aparatı üstündə öldüyünü deyib.

“Qardaşım onu bıçaqlayaraq öldürən Əhəd İsmayılovun oğlu Nicat İsmayılovla dost olub. Hətta Nicat evdəkilərdən küsəndə bizdə qalırdı, qardaşım yatağını ona verirdi, get-gəlişimiz var idi. Sonra münasibətləri pozulub. Onun balaca oğlu Ramili isə qardaşım idmana aparıb, ona böyük qardaş kimi davranıb. Hazırda Nicat Gürcüstandadır, onun hadisə ilə heç bir əlaqəsi yoxdur. Hadisə Ramil İsmayılovla qardaşım arasında baş verən mübahisədən sonra yaşanıb. Belə ki, sentyabrın 4-dən 5-nə keçən gecə qardaşım dostu ilə Sumqayıtdakı ineternet klubların birinə daxil olub. Həmişə getdiyi yerdir, oranı işlədən şəxsdən telefonunun “zaryatka” toplaması üçün adapter istəyib. O da adapterin yerini göstərib. Həmin vaxt Ramilin telefonu enerji yığırmış. Rasif Ramilin telefonunun enerji ilə dolduğunu görüb çıxaranda o söyüş söyməyə başlayıb. Ramil söyüş söyəndən sonra onların arasında mübahisə olub, Rasif onu şillə ilə vurub. Daha sonra həmin məkanı tərk edib. Bütün bunların hamısının görüntüləri var. Hətta qardaşım sonradan dostlarına tapşırıb ki, onun əvəzindən gedib Ramilin könlünü alsınlar. Desinlər ki, böyük qardaş kimi ərk edib vurub. Bu zaman Ramil atasına hadisə barədə məlumat verib, hər ikisi evdən bıçaq götürərək çıxıblar. Ramil atası ilə çayxanaya gəlib, aralarında yenə mübahisə yaranıb, ata-bala Rasifi söyüblər, daha sonra söhbət etmək üçün qardaşımı kənara dəvət ediblər. O, Ramilgilin maşınına minib gedəndə dostu Samir Dadaşov yanında olub, tək qoymamaq üçün o da gedib. Hadisə yeri çayxanadan çox da uzaqda deyil, lakin nisbətən qaranlıq yerdir. Onlar hadisə yerinə çatan kimi Ramilin atası Əhəd söyüş söyməyə başlayıb. Rasif yaşına görə ona hörmət etdiyini deyib və irəli getməməsi üçün xəbərdarlıq edib. Lakin Əhəd İsmayılov Rasifə bıçaqla vurub. Rasif hər gün idmanla məşğul olur, ona görə heç bıçaq zərbəsini hiss etməyib. Bu zaman Ramil İsmayılov Samirlə dalaşmağa başlayıb. Həmin vaxtda Ramil Samirə 3 bıçaq zərbəsi vurub. Samir Rasifə kömək edə bilməyib. Samirin sözlərinə görə, əvvəl bıçaqlandığını hiss etməyib, amma Ramilin onu vurub meşəliyə doğru qaçanda əlində bıçaq olduğunu görüb. Samir deyir ki, həmin vaxt Rasif Əhədi üzü üstə çökdürsə də, o bıçaqla qardaşıma zərbələrə endirirmiş. Sonra Samir Rasifi xəstəxanaya aparıb. Qardaşım Sumqayıtda xəstəxanaya yerləşdirilib, o 5 yerindən – Samir isə 3 yerdən bıçaqlanıb”.

V.Həbibov ata-balanın cinayəti planlayaraq törətdiklərini bildirib:

Ramil və atası Əhədin evdən çıxma görüntüləri də var. Həmin görüntülərdə onların evdən çıxarkən Ramilin anasının mənzildən necə həyəcanla çıxdığı görünür. Yəqin ki, qadın yoldaşı ilə oğlunun evdən bıçaq götürdüyünü bildiyinə görə həyəcan keçirib”.