Yeni Azərbaycan Partiyasının 43 saylı Sumqayıt üçüncü seçki dairəsindən deputatlığa namizədi Emin Hacıyevin “Yeni Sabah”a müsahibəsi:
– Artıq bir neçə gündür seçkilərlə bağlı təbliğat-təşviqat kampaniyası başlayıb. Geridə qalan müddəti necə dəyərləndirirsiniz və kampaniyanın sonrakı mərhələsində hansı tədbirləriniz var?
– Bəli, təbliğat-təşviqat mərhələsi uğurla davam edir. Vətəndaşlarla kütləvi görüşlərimiz davam edir və hər gün onlarla təmasdayıq. Deməliyəm ki, artıq bir aya yaxındır sumqayıtlılarla, seçicilərimlə görüşür, onları qayğılandıran məsələləri müzakirə edirik. Bu, bizə yetkin platforma hazırlamaq üçün vacib idi və düşünürəm ki, platformamızda da sumqayıtlıların istəkləri, gözləntiləri öz əksini tapır. Təşviqat dövründə də onlarla görüşlərimiz olduqca sıx intervalla davam edir, evlərdə, məhəllələrdə, müxtəlif yerlərdə bu görüşlər və müzakirələrimiz davam edir.
– Bəli, mən Sumqayıtda doğulmuşam. Bu şəhərin hər yeri, hər məhəlləsi, mikrorayonu, hər döngəsi mənim üçün əzizdir. 22 və 5 saylı məktəblərdə təhsil almışam. Daha sonra Rusiyada təhsil aldığım və konsulluqda, eləcə də, Rusiya Azərbaycanlı Gənclər Birliyinin məsul katibi kimi çalışdığım dövrlərdə də Sumqayıtla bağlarımız davam edib. Ordakı diaspor işimizdə Azərbaycan, eləcə də, Sumqayıt həqiqətlərinin dünyaya çatdırılmasına xüsusi əhəmiyyət vermişik.
Mənim atam və anam həkimdirlər və uzun illər Sumqayıtın tibb müəssisələrində çalışıblar. Sumqayıt sürətlə böyüyən, inkişaf edən şəhərdir, ancaq o qədər böyük şəhər deyil, meqapolis deyil. Burda hər kəs bir-birini tanıyır, bu kiçik şəhərdə həmişə isti münasibət hökm sürüb.
Düşünürəm ki, Sumqayıt mənim üçün necə əzizdirsə, mən də sumqayıtlılar üçün doğmayam.
Bu münasibəti biz seçicilərlə görüşlərdə də hiss edirik.
– Sizin fikrinizcə, dairənizdə həll olunası problemlər hansılardır və sizin üçün prioritet məsələ nədir?
– Ümumiyyətlə, deməliyəm ki, son illərdə Sumqayıtın inkişafı, xüsusilə infrastrukturun yaxşılaşdırılması və sosial məsələlərin həlli istiqamətində çox effektiv, nəticəyönümlü işlər aparılıb. Bunu şəhərimizin dəyişən simasında çox aydın müşahidə etmək olur.
Platforma və planlarımız çox genişdir, çoxspektrlidir. Ancaq qısaca olaraq onu qeyd edə bilərəm ki, seçicilər etimad göstərəcəyi təqdirdə Sumqayıtın sosial-iqtisadi potensialının tam həcmdə realizəsi üçün qanunverici orqanın imkanlarından istifadə olunması, yerli və xarici investisiyanın cəlb olunması, şəhərimizin turizm sahəsindəki potensialını inkişaf etdirmək, əhalinin aztəminatlı hissəsinin sosial vəziyyətinin yaxşılaşdırılması, gənclərin məşğulluğunun təmin olunmasına xidmət edəcək proqram və layihələrin qəbulu istiqamətində təşəbbüslər, təhsil və tibb müəssisələrimizdə keyfiyyətin daha da artırılması üçün addımlar fəaliyyətimizin əsas prioritetləri olacaq.
– Bu vaxta kimi keçirdiyiniz görüşlərdə sakinlərin qaldırdığı əsas məsələ nə olub?
– Sakinlər ölkədə, şəhərimizdə aparılan işlərdən məmnunluqlarını ifadə edir, bu işlərin təşəbbüskarına – cənab İlham Əliyevə təşəkkürlərini bildirirlər. Ancaq aydın məsələdir ki, həyat varsa, qayğılar da var, problemlər də.
İşlə təminat, sağlamlıq problemlərinin həlli, bir sıra məhəlli xarakterli məsələlərlə bağlı müraciətlərə rast gəlirik və inanırıq ki, qısa zamanda bütün bu məsələləri birlikdə həll edəcəyik.
Ulu Öndərimiz Heydər Əliyevin yaratdığı Azərbaycanda son vaxtlar Möhtərəm Prezidentimiz cənab İlham Əliyevin həyata keçirdiyi islahatlar hər kəs tərəfindən müsbət qarşılanır.
Növbədənkənar parlament seçkilərinin keçirilməsi haqda qərar da bu islahatların tərkib hissələrindən biridir. Biz Azərbaycan gəncləri olaraq bu prosesdə aktiv iştirak etməliyik.
Keçirdiyimiz görüşlərdə seçicilər həm struktur, həm də kadr islahatlarını dəstəklədiklərini açıq şəkildə ifadə edirlər. Azərbaycan gəncləri hər zaman olduğu kimi yenə Möhtərəm Prezidentimiz cənab İlham Əliyevin yanındadırlar və Sumqayıt gəncləri də ön sıralardan birini tutur.
– Gənclərimizin bir hissəsinin problemi zərərli vərdişlərə meyillənməsidir. Sağlam həyatı təbliğ edən gənc kimi, bu problemdən çıxış yolunu nədə görürsünüz?
– Hesab edirəm ki, yeniyetmələrimizi, gənclərimizi xüsusilə iki istiqamətə – intellektual fəaliyyətə, mütaliəyə və idmana meyilləndirməliyik. Kitabın və idmanın təbliği zərərli vərdişlərə marağı azaldacaq. Belə bir deyim var, dünyanı gözəllik xilas edəcək. Burada “gözəllik” dedikdə yalnız zahiri əlamətlər nəzərdə tutulmur. Yaxşı əməl də, yaxşı niyyət də gözəldir, gözəllikdir.
– Gənclərlə bağlı namizəd olduğunuz dairədə durum necədir?
– Bu gün ölkəmizdə gənclər siyasəti gənclərin özünü inkişaf etdirməsinə, bilik və bacarıqlarını realizə etməsinə imkan verir. Baxsaq, idarəçilikdə də onların rolu getdikcə artmaqdadır. Bu, düşünülmüş, məqsədyönülü siyasətin nəticəsidir.
Ümummilli lider Heydər Əliyev Sumqayıtı istedadlı gənclər şəhəri adlandırıb. Bu, həqiqətən də belədir, sumqayıtlı gənclər istedadları, intellektləri, zəhmətkeşlikləri sayəsində ölkənin ən aparıcı qurumlarında, şirkətlərində mühüm vəzifələrdə çalışırlar. Mənim seçicilərim arasında da belə gənclər üstünlük təşkil edir. Etimad göstərilib, millət vəkili seçiləcəyim təqdirdə biz həmin gənclərlə sıx işləyəcəyik.
– Sumqayıtda gənclərin məşğulluğu ilə bağlı müəyyən problemlər var. Siz də platformanızda bu məsələyə diqqət yetirəcəyinizi qeyd etmisiniz. Hansı addımlar atmağı düşünürsünüz?
– Sumqayıtda gənclərin məşğulluq problemlərinin nəzərəçarpacaq dərəcədə olması ilə tam razılaşa bilmərəm. Son 16 ildə ölkəmizdə işsizlik 50 faizdən 5 faizədək azaldılıb. Gənclərin məşğulluq problemlərinin həlli də dövlətimizin prioritetləri sırasındadır. Millət vəkili seçiləcəyim təqdirdə bu istiqamətdə dövlət gənclər siyasətinə dəstək verməyə çalışacam.
Gənclərin məşğulluğunun artırılmasına xidmət edəcək proqram və layihələrin qəbulu istiqamətində, gənc ailələr üçün ipoteka şərtlərinin asanlaşdırılması üçün qanunvericilik təşəbbüsləri, müvafiq dövlət və qeyri-hökumət strukturları tərəfindən yaradılmış mədəni-intellektual klublara, dərnəklərə gənclərin cəlb olunması, bu platformalarda maraqlı layihələrin həyata keçirilməsi, gənclərin yay və qış məktəblərində iştirakının təmin olunması yönündə çalışacağam.
– Sumqayıt təhsil və idman sahəsində öndə gedən şəhərlərdən sayılır. Bu sahələri daha da inkişaf etdirmək üçün layihə və proqramlarınız varmı?
– Bəli, platformamızda bu sahə ilə bağlı tezislər əksini tapır. Hansı ki, bu tezislər bizim gələcək fəaliyyət proqramımızın əsas istiqamətlərini təşkil edəcək.
Başlıca istiqamətlər ondan ibarətdir ki, ali, orta-ixtisas, peşə və orta təhsil müəssisələrində təhsilin keyfiyyətinin artırılması, müasir çağırışlara uyğunlaşdırılması istiqamətində təşəbbüslər, məktəbliləri startap layihələr hazırlamağa təşviq etmək, ali, orta-ixtisas və peşə məktəblərində texnoparkların, biznes inkubasiya mərkəzlərinin yaradılması və hazırlanmış prototiplərin investorlara təqdim olunması istiqamətində addımlar və s. təşəbbüslər nəzərdə tutulur.
Eləcə də, gənclər arasında idmanın təbliği və bu istiqamətdə infrastrukturun yaxşılaşdırılması üçün təşəbbüslərlə çıxış edəcəyik.
– Sizin namizəd olduğunu dairədə xeyli sayda məcburi köçkünlər məskunlaşıb. Onlarla münasibətiniz necə olacaq? Həmin məcburi köçkünlərin də problemlərini lazımi tribunalarda qaldıracaqsınızmı?
– Millət vəkili olaraq bir dairənin yox, xalqın vəkili olmalıyıq. Dövlətimiz tərəfindən məcburi köçkünlərin rifahının, mənzil-həyat şəraitinin yaxşılaşdırılması istiqamətində ardıcıl olaraq işlər aparılır.
Bu günə qədər 30-dan çox şəhər və rayonda Azərbaycan dövləti tərəfindən 110 yeni qəsəbə salınıb. 65000 məcburi köçkün ailəsi və yaxud 315000-ə yaxın soydaşımız yeni qəsəbələrdə mənzillərlə təmin olunub. Bu proses 2020-ci ildə də davam etdiriləcək. Biz də millət vəkili olaraq dövlət siyasətinə öz səlahiyyətlərimiz, imkanlarımız daxilində dəstək verməliyik və təbii ki, əlimizdən gələni bu istiqamətdə də edəcəyik, səylə çalışacağıq.
– Seçkilərdə qalib gələcəyiniz halda, növbəti 5 ildə seçicilər üçün nə qədər əlçatan millət vəkili olacaqsınız?
– Bu gün necə seçicilərimizin içindəyiksə, millət vəkili seçildikdə də o cür olacaq. Kommunikasiya bu gün daha rahatdır. Yeni texnologiyalar, internet həm informasiyaları əlçatan edir, həm də əlaqəni, komunikasiyanı rahatlaşdırır, daha əlçatan edir.
Etimad göstəriləcəyi, millət vəkili seçiləcəyim təqdirdə dairə ərazisində daimi qərargahımız fəaliyyət göstərəcək. Digər bir tərəfdən, seçicilərimizin müraciətlərini sosial şəbəkələr, telefon və elektron poçt vasitəsilə ardıcıl olaraq qəbul edəcək, həmin müraciətləri operativ olaraq araşdırıb, imkanlarımız daxilində köməklik göstərəcəyik.
Eyni zamanda, hesabatlılıq təmin olunacaq – mütəmadi olaraq görülmüş işlər, eləcə də seçici müraciətləri ilə bağlı atılmış addımlar haqda hesabatlar açıqlayacağıq.
