Azərbaycan futbol çempionatının birinci dəstəsinin güclü və perspektivli debütantı olan «Sumqayıt» futbol komandası artıq dördüncü dəfədir ki, uğursuzluq nə olduğunu bilmədən turnir cədvəlində inamla irəliləməkdədir. Özgə meydançalarında qazandığı qələbələr seriyasını, nəhayət ki, öz meydançasında da davam etdirməyə başlamış «Sumqayıt» ötən bazar günü M.Hüseynzadə adına Sumqayıt şəhər stadionunda «Şuşa-09» komandasını qəbul edərək, onu 1:0 hesabı ilə məğlubiyyətə uğratmışdır.
Komandanın bir-neçə təcrübəli oyunçusunun zədəli olduğundan meydançaya çıxmadığına baxmayaraq, sumqayıtlılar bütün qüvvələrini səfərbərliyə almış, gərgin idman mübarizəsi şəraitində keçən oyunda dəfələrlə əlverişli qol vəziyyəti yaratmış və onlardan birini uğurla reallaşdıra bilmişlər. Bu, matçın 60-cı dəqiqəsində baş vermişdir. Perspektivli idmançı, «futbol civəsi» kimi özünəməxsus cəldlik və çevikliklə meydançanın hər yerində görünərək, topa yiyələnməyi bacaran Əsgər Abbasovun qoşulduğu sürətli hücumların birində topu qəbul edən hücumçu Həsən Allahverdiyev rəqibin müdafiə xəttini çox ustalıqla və qətiyyətlə yararaq, öz məharətli qolu ilə sumqayıtlı pərəstişkarlarını sevindirmişdir.
«Sumqayıt» komandası hazırda 36 xalla turnir cədvəlinin 5-ci pilləsində qərarlaşmışdır.
Komandanın növbəti oyunu şənbə günü – aprelin 9-da yenə də doğma şəhərdə, M.Hüseynzadə adına şəhər stadionunda keçiriləcəkdir. «Sumqayıt» həmin gün Qusarın «Şahdağ» komandasını qəbul edəcəkdir. Xatırladaq ki, çempionatın birinci dövrəsində qusarlıların qonağı olmuş «Sumqayıt» Qusarda öz rəqibi üzərində inamlı qələbə qazanmışdı. Bu səbəbdən oyunun son dərəcə gərgin və maraqlı keçəcəyi gözlənilir.
Hamınızı bu oyuna tamaşa etməyə, komandamıza dəstək olmağa dəvət edirik. Oyun saat 15-00-da başlanacaqdır. Giriş pulsuzdur.