Dünyaşöhrətli şair və ictimai xadim, BMT-nin himayəsi ilə işıq üzü görən World Poetry Almanac dərgisinin naşiri, Dünya Sülh mükafatı laureatı, Avrasiya Millətlər Assambleyası Ədəbiyyat Şurasının həmsədri Xadaa Sendoo “168 saat” qəzetinə müsahibə verib.
Bakıda BMT-nin himayəsi ilə, Avrasiya Millətlər Assambleyasının, LiFFt Fondunun, Heydər Əliyev Fondunun təşkilatçılığı ilə keçiriləcək Avrasiya Materikinin ədəbiyyat üzrə 4-cü “LiFFt” festifallar festifalında iştirak edəcək Xadaa Sendoo müsahibəsində öz yaradıcılığından bəhs etməklə yanaşı dünya ədəbiyyatında poeziyanın yerini müəyyənləşdirməyə çalışmış, Azərbaycan ədəbiyyatı və tarixinə toxunmuş, Dağlıq Qarabağ probleminə Uzaq Şərqdən olan baxışı sərgiləmiş, Azərbaycana ilk səfərini səbirsizliklə gözlədiyini qeyd edib.
“Poeziyanın yaşı çox qədimdir, o, şifahi ədəbiyyatın bir nümunəsidir, epik janrın, rep-artın sələfidir. Poeziya-qədim insan təfəkkürünün, insanlığın sivilizasiyasıdır, canlıların, hətta cansızların qəlbinin vəsfi, yol işıqlandıran məşəl, bir etnosun, xalqın ruhudur. Poeziya Günəş kimi, Ay kimi yaranıb. O, heç vaxt yox olmayacaq” söyləyən ədib Azərbaycanı böyük Nizami Gəncəvinin vətəni olaraq bir ədəbiyyat ölkəsi adlandırmış, ona görə də bu ölkədə oxucuların yüksək ədəbi zövqə malik olduqlarına əminliyini bildirmişdir.
O qeyd etmişdir ki, mənəviyyatın öz əzəlki funksiyalarını qorumasında ədəbiyyat misilsiz rol oynayır. Ədəbiyyat uçurumdan qoruyandır. Məhz Azərbaycanın necə zəngin ədəbi ənənələrinin olması məlumdur. Böyük Nizami Gəncəvinin vətəni olan Azərbaycan öz şanlı tarixini, çoxillik ənənələrini milli mədəniyyətinin tərkib hissəsi kimi gələcəyə daşımaqdadır.
Azərbaycanın zorla cəlb olunduğu və 20 faiz torpaqlarının itirilməsi ilə nəticələnən Dağlıq Qarabağ problemi barədə sualı cavablandırarkən Xadaa Sendoo söyləyib:
”Lap öncədən mən münaqişənin sülh yolu ilə, “ərazi bütövlüyü” şərti altında həllinin tərəfdarı olmuşam, bu gün də öz fikrimdə qalıram. Bir müddət öncə BMT-nin Baş katibi Antoniu Quterriş Azərbaycan Prezidenti İlham Əliyevlə Ermənistanın baş naziri Nikol Paşinyanın Avropa Əməkdaşlıq və Təhlükəsizlik təşkilatının təşəbbüsü ilə Vyanada keçirilən görüşlərini alqışlayan bəyanatla çıxış etdi. Mən əminəm ki, Azərbaycanla Ermənistan arasındakı münasibətlərdə tezliklə əsil sülh baharı bərqərar olacaq. Və mən, azərbaycanlı şairin şeirlər kitabını intonasiya ilə oxuyub məmnun qalan bir erməni oxucusuna da tezliklə göz şahidliyi edəcəyimə əminəm.”
Azərbaycana gələcəyini səbisizliklə gözlədiyini xüsusən vurğulayan ədib bildirmişdir ki, böyük məmnuniyyətlə Nizaminin məqbərəsini, Qobustan qayaüstü rəsmlərini, Qız Qalasını, Şirvanşahlar sarayını, Atəşgahı ziyarət edəcək. Müsahibəsində dünyaşöhrətli yazar Azərbaycan Prezidenti İlham Əliyevin ”möcüzə” adlandırdlğı Sumqayıt bulvarını görməyə can atdığını da vurğulamışdır. Yazar söyləmişdir:
”Maraqla görüşünə can atacağım bir ünvan da Sumqayıtın möcüzəvi bulvarı olacaq. Mən ötən il mediadan Sumqayıt bulvarı barədə çox maraqlı məlumatlar oxumuşam. Qeyd olunub ki, 160 hektar ərazini tutan, Xəzər dənizi boyunca 4 km məsafədə uzanan bu nəhəng bulvar rekord qisa müddətdə – cəmi 330 günə inşa olunub və hətta o, Ginnesin rekordlar kitabına düşməyə belə iddialıdır.”
Xatərladaq ki, Avrasiya Materikinin ədəbiyyat üzrə 4-cü “LiFFt” festifallar festivalı sentyabr ayının 30-dan oktyabr ayının 3-dək 50 ölkənin 150 nüfuzlu ədəbiyyat xadiminin iştirakı ilə Bakı şəhərində keçiriləcək. Festivalın Bakıda keçirilməsini ötən il Rusiya Federasiyasının Soçı şəhərində keçirilən 3-cü festivalda Azərbaycan yazıçısı Varis Yolçuyevin laureat olaraq qızıl medala layiq görülməsi şərtləndirib.
Bakıda keçiriləcək 4-cü LiFFt festivalının fəxri səfiri Leyla Əliyeva seçılıb, Festivalın Azərbaycan üzrə fəxri spikerləri sırasında ölkəmizin Anar, Elçın Əfəndiyev, Ramiz Fətəliyev, Kamal Abdulla, Nizami Cəfərov, Çingiz Abdullayev kimi tanınmış ədəbiyyat xadimləri yer alacaq.