Azərbaycan Çindən öndədir – Vira Platonova

295

Mərkəzi Bankın sədrinin birinci müavini Alim Quliyev Visa beynəlxalq kart təşkilatının Şərqi Avropa, Mərkəzi Asiya və Cənub-Şərqi Avropa ərazisi üzrə 17 ölkədə Visa əməliyyatlarına rəhbərlik edən Vira Platonovanın başçılıq etdiyi nümayəndə heyətini qəbul edib. Fins.az Mərkəzi Banka istinadən xəbər verir ki, görüşün mövzusu ölkədə nağdsız hesablaşmaların inkişafı, müasir ödəniş həllərinin tətbiqi və bu kontekstdə Azərbaycan Respublikası Prezidentinin 2018-ci il 26 sentyabr tarixli 508 nömrəli Sərəncamı ilə təsdiq edilmiş “2018–2020-ci illərdə Azərbaycan Respublikasında rəqəmsal ödənişlərin genişləndirilməsi üzrə Dövlət Proqramı”nın icrası istiqamətində birgə mümkün əməkdaşlıq istiqamətlərinin müzakirəsi olub.

Görüşdə son dövrlər Mərkəzi Bank tərəfindən nağdsız ödənişlərin genişləndirilməsi istiqamətində görülmüş işlər, həyata keçirilən layihələr və əldə olunmuş nailiyyətlər barədə məlumat verilib.

Vira Platonova qeyd edib ki, sürətli inkişaf edən bir ölkə kimi Azərbaycan təşkilat rəhbərliyinin diqqət mərkəzindədir və təşkilat ölkədə fəaliyyətini aktivləşdirmək, yeni innovativ ödəniş həllərini ölkəyə gətirmək və Mərkəzi Bankın rəhbərliyi altında həyata keçirilən rəqəmsal ödənişlərin inkişafı üzrə layihələrə dəstək vermək niyyətindədir. O, həmçinin “The Economist” jurnalının araşdırma qolu olan “The Economist Intelligence Unit” şirkətinin Visa təşkilatının sponsorluğu ilə təşkil edilmiş 2018-ci ildə dövlət ödənişləri üzrə bir sıra ölkələrin nailiyyətləri haqda aparılmış “The 2018 Government E-Payments Adoption Ranking” (GEAR) araşdırmasının nəticələrini diqqətə çatdıraraq ümumi reytinqdə Azərbaycanın 73 ölkə içərisində 46-cı yer tutmasını və bu göstərici ilə Tayland, Çin və İndoneziya kimi ölkələri qabaqladığını bildirib.

Görüş zamanı Dövlət Proqramında nəzərdə tutulmuş strateji hədəflərin realizasiyası üzrə növbəti dövr üçün qarşılıqlı mümkün fəaliyyət istiqamətləri müzakirə edilmiş və nəqliyyat sektorunda, təhsil müəssisələrində müasir nağdsız ödəniş imkanlarının yaradılması və əhalinin maliyyə savadlılığının artırılması kimi sahələrdə birgə əməkdaşlıq barədə razılığa gəlinib. Eyni zamanda cari ildə Visa beynəlxalq kart təşkilatı tərəfindən regionlarda stimullaşdırıcı kampaniyaların keçirilmə imkanları da müzakirə edilib. Görüşün yekunu olaraq, hər iki tərəfin maraqlarını əhatə edən, görüləcək işləri özündə birləşdirəcək bir çərçivə sənədinin hazırlanması və imzalanması barədə qərar qəbul edilib.

www.sumqayitxeber.com

Kateqoriyalar:
Etiketlər:
Şərhlər

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

*

*

*

Facebook Şərhlər
Bənzər Xəbərlər