BP şirkətinin nümayəndə heyəti Sumqayıt Texnologiyalar Parkında (STP) olub.
Xeberle.com xəbər verir ki, şirkətdən AZƏRTAC-a bildiriblər ki, əvvəlcə qonaqlara STP haqqında ümumi məlumat verilib. Bildirilib ki, 2009-cu ildən fəaliyyət göstərən Sumqayıt Texnologiyalar Parkında yaradılmış istehsal sahələrinin potensialı Azərbaycan iqtisadiyyatının qeyri-neft sektorunun inkişafının bariz nümunəsidir.
Daha sonra STP-nin baş direktoru Emin Məmmədovun da iştirakı ilə geniş tərkibli görüş keçirilib. İki şirkət arasında əlaqələr müzakirə olunub. Qonaqlar “Şahdəniz-2” layihəsində STP-nin iştirakını xüsusi vurğulayıblar və bu cür əməkdaşlığın davamlı olmasında maraqlı olduqlarını bildiriblər.
Baş direktor da çıxışı zamanı iki şirkət arasında əlaqələrin daha da genişləndirilməsində maraqlı olduqlarını qonaqların diqqətinə çatdırıb. Qeyd edib ki, STP-nin tərkibində olan müəssisələr istehsal etdiyi yüksək keyfiyyətli, beynəlxalq standartlara cavab verən məhsulları və xidmətləri ilə istənilən layihədə uğurla iştirak etməyə hazırdırlar.
Görüşdən sonra BP şirkətinin nümayəndə heyəti istehsal prosesi ilə yaxından tanış olmaq üçün müəssisələri gəziblər. Qonaqlara istehsal olunan məhsullar haqqında geniş məlumat verilib, onları maraqlandıran suallar cavablandırılıb.

www.sumqayitxeber.com