Əbülfəs Qarayev Sumqayıtda bir sıra mədəniyyət ocaqlarının fəaliyyəti ilə tanış olub

2270

Mədəniyyət naziri Əbülfəs Qarayev yanvarın 31-də Sumqayıt şəhərində bir sıra mədəniyyət müəssisələrinə baş çəkib.

AZƏRTAC xəbər verir ki, nazir ilk olaraq Sumqayıt Şəhər İcra Hakimiyyətinin başçısı Zakir Fərəcovla birgə Heydər Əliyev Mərkəzinin foyesində Sumqayıt Regional Mədəniyyət İdarəsinin nəzdində yaradılmış “Mədəniyyət könüllüləri” dəstəsinin təqdimatında iştirak edib.

Mərasimdə çıxış edən Əbülfəs Qarayev bildirib ki, ölkəmizin ev sahibliyi etdiyi mötəbər beynəlxalq tədbirlərin təşkilində gənclərimizdən ibarət könüllülər də fəal iştirak edirlər. Prezident İlham Əliyevin Sərəncamı ilə 2020-ci il ölkəmizdə “Könüllülər ili” elan olunub. Nazir könüllü gənclərlə işin təşkilinin sistemləşdirilməsi, onların mədəniyyət sahəsində fəaliyyətinin stimullaşdırılması məqsədilə nazirliyin müəssisələrində könüllülər şəbəkəsinin formalaşdırılmasının əhəmiyyətini vurğulayıb. “Bu proqram ölkədə vahid mədəniyyət könüllüləri bazasının yaradılmasında mühüm rol oynayır. Fəal könüllər gələcəkdə Mədəniyyət Nazirliyi sistemində vakansiya yaranan zaman işlə təmin olunacaqlar”, – deyə nazir bildirib.

Nazir, həmçinin Heydər Əliyev Mərkəzində tərtibatçı-rəssam Ramin Allahverdiyevin əl işlərindən ibarət sərgi ilə tanış olub. Sərgidə fərqli formatda hazırlanan geniş çeşidli suvenirlər nümayiş etdirilir.

Əbülfəs Qarayev daha sonra Sumqayıt şəhərində yerləşən bir sıra mədəniyyət müəssisələrinin fəaliyyəti ilə tanış olub.

Şəhərdəki “Nizami” kinoteatrı ilə tanış olan nazirə məlumat verilib ki, ötən il açılışı keçirilən ikimərtəbəli binada hər biri 80-100 yerlik olmaqla üç kinozal və digər inzibati otaqlar var. Müasir səviyyədə yaradılan, ən son texnoloji yeniliklərə əsaslanan video və audiosistemlə təchiz olunan kinoteatrın yeni binasının istifadəyə verilməsi Sumqayıtın mədəni həyatında mühüm hadisədir. Bu, şəhər həyatı ilə bağlı mədəni tədbirlərin keçirilməsini daha da stimullaşdıracaq, insanların istirahətinin təşkilində əhəmiyyətli rol oynayacaq, gənclərin bu tədbirlərdə daha fəal iştirakına təkan verəcək.

Əbülfəs Qarayev daha sonra Sumqayıt Bulvarı ərazisində yerləşən Muğam Mərkəzinin fəaliyyəti ilə tanış olub. Diqqətə çatdırılıb ki, mərkəzin binasında konfrans zalı, qrim, məşq, rejissor otaqları yaradılıb və zəruri avadanlıqla təchiz edilib. Tamaşaçı tutumu 400 nəfər olan konsert zalında müxtəlif mədəni tədbirlərin, o cümlədən muğam gecələrinin keçirilməsi üçün hər cür şərait var.

Nazir, həmçinin Bayraq Muzeyi və Sumqayıt Bulvarı ilə də tanış olub.

www.sumqayitxeber.com

Kateqoriyalar:
Etiketlər:
Şərhlər

Bir cavab yazın

Facebook Şərhlər
Bənzər Xəbərlər