Sumqayıtda II karbamid zavodunun inşasının 20-25% ucuz başa gələcəyi gözlənilir.
Report” xəbər verir ki, bu barədə jurnalistlərə Azərbaycan Dövlət Neft Şirkətinin (SOCAR) Karbamid Zavodunun direktoru Xəyal Cəfərov bildirib.
Onun sözlərinə görə, bu həm infrastrukturun olması, həm də vergilərdən azadolma sayəsində mümkün olacaq: “Yeni zavod mövcud zavodla eyni olacaq. Karbamidə böyük tələbat olduğunu görürük, lakin mövcud zavodun layihə gücünü artırmaq mümkün deyil. Ona görə də analoji zavodun tikintisinə qərar verilib. Ümumzavod təsərrüfatı-xammalı daşıyan kəmərlər, inzibati bina, laboratoriya, ehtiyat hissələri, kimyəvi maddələr üçün anbarlar, idarəetmə hər iki zavod üçün eyni olacaq. Bütün bunlar həmçinin vergilərdən azadolmanı da nəzərə alaraq ikinci zavodun inşasının daha ucuz olacağını deməyə əsas verir. Lakin daha dəqiq rəqəm mühəndislikdən sonra müəyyənləşəcək”.
Qeyd edək ki, mayın 31-də SOCAR və “Tekfen” şirkətləri Azərbaycanda yeni karbamid zavodunun tikilməsinə dair qarşılıqlı anlaşma memorandumu imzalayıblar.
SOCAR uğurla ərsəyə gətirdiyi mövcud Karbamid Zavodunun tikintisində əldə etdiyi təcrübəyə əsaslanaraq Sumqayıtda gündəlik istehsal gücü 1200 ton ammonyak və 2000 ton karbamid həcmində olan yeni istehsalat obyektinin tikintisini nəzərdən keçirir. Memorandumda həmçinin mövcud və yeni gübrə kompleksinin məhsullarının marketinqi üzrə əməkdaşlıq nəzərdə tutulur.
Sənədə əsasən, növbəti mərhələdə şirkətlər arasında İşçi Qrup yaradılacaq və yeni zavodun inşası ilə bağlı yekun qərarın verilməsi üçün aşağıdakı məsələlər təhlil ediləcək:
– Tekfen Contracting Qrupuna daxil olan şirkətlərin sözügedən zavoddakı obyektlərin tikintisində EPC (mühəndislik, satınalma və inşaat-montaj) əsasında mümkün iştirakı;
– Tikiləcək obyektlərdə istehsal edilməsi planlaşdırılan və əlavə dəyər yaradacaq məhsulların marketinq, satış və paylanması işlərinin Tekfenin Türkiyə bazarında geniş diler şəbəkəsinə malik törəmə şirkəti Toros Tarım tərəfindən aparılması, yeni məhsulların inkişafı və dünyanın müxtəlif regionlarında bazara çıxarılması perspektivinin effektivliyi;
– Yeni kompleksin tikilib istifadəyə veriləcəyi dövr ərzində Toros Tarım-ın mövcud SOCAR Karbamid zavodunda istehsal olunan məhsulların marketinqi, satışı və paylanmasında mümkün rolu;
– Yeni Karbamid zavodunda SOCAR və Tekfenin ortaq səhmdarlar qismində iştirak etməsi.
SOCAR bu gün şaquli inteqrasiya olunmuş çevik və yüksək rəqabət qabiliyyətli bir şirkət kimi neft və qaz sənayesinin müxtəlif sahələrində uğurla fəaliyyət göstərir. Son illərdə şirkət neft və qaz kimyası sənayesində fəaliyyətini əhəmiyyətli dərəcədə artırıb, Azərbaycanda polimer məhsulları və karbamid gübrəsinin istehsalı üzrə yeni zavodlar inşa edərək istismara verib. SOCAR Polymer və SOCAR Karbamid zavodları şirkətin dəyər zəncirində son həlqələr olaraq, öz xammalını SOCAR-ın digər müəssisələrindən əldə edir və bu sinerjidən böyük miqyasda əlavə dəyər yaranır. SOCAR Azərbaycanın gəlirlərinin artırılması və ölkədə yeni iş yerlərinin yaradılması məqsədi ilə yeni investisiya imkanlarını araşdırmaqda davam edir.