Tahir Mirkişili: “Prezidentin təşəbbüsü ilə başlayan layihələr qlobal enerji layihələrinə çevrilib”

687

“Məhz Azərbaycan Xəzər dənizini dünyaya açdı, Xəzərin neft və qaz yataqlarına ilk xarici sərmayələr yatırıldı”.

Bunu APA-ya açıqlamasında Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili bildirib.

Tahir Mirkişili deyib ki, çox mürəkkəb siyasi mühitdə reallığa çevrilən Bakı-Supsa neft boru kəməri, “Şahdəniz” yatağındakı fəaliyyət, Bakı-Tbilisi-Ərzurum qaz boru kəməri, Bakı-Tbilisi-Ceyhan neft boru kəməri kimi nəhəng, texniki və maliyyə baxımından çətin infrastruktur layihələrinin uğurla icrası Azərbaycanı dünyaya etibarlı tərəfdaş kimi tanıdıb: “Prezident İlham Əliyevin Bakı Ekspo Mərkəzində Bakı Enerji Həftəsi çərçivəsində 27-ci Beynəlxalq Xəzər Neft və Qaz Sərgisinin rəsmi açılış mərasimində çıxışında da vurğuladığı kimi, Azərbaycan öhdəliklərinə hörmət edən etibarlı ölkə kimi özünü təsdiqləyib. Hasilatın pay bölgüsünə dair 1994-cü ildə xarici şirkətlərlə imzalanmış ilk sazişdən bu günə qədər müqavilələrdə bir söz belə dəyişdirilməyib. Bu isə bizim mövqeyimizin təzahürüdür. Biz öz öhdəliklərimizə hörmət edirik və tərəfdaşlarımızdan öz öhdəliklərinə hörmət etməyi gözləyirik

Parlamentin İqtisadi siyasət, sənaye və sahibkarlıq komitəsinin sədri XXI əsrin boru kəməri olan Cənub Qaz Dəhlizinin bir çox ölkələri keçərək, dənizin dibindən tutmuş uca dağ zirvələrinə qədər 3500 kilometrlik vahid boru kəmərləri sistemi yaradaraq qüdrət və dostluq rəmzinə çevrildiyini vurğulayıb: “Dövlət başçısının da vurğuladığı kimi, Cənub Qaz Dəhlizinin 2020-ci ilin sonuncu günündə uğurla tamamlanması ümumi iradəmizi, komanda daxilində işləmək və böyük uğurları qazanmaq bacarığımızı nümayiş etdirir. Prezident İlham Əliyevin təşəbbüsü ilə Azərbaycanın ilkin mərhələdə başlatdığı enerji layihələri regional əməkdaşlıq üçün çərçivə yaradıb və onlar hazırda qlobal enerji layihələrinə çevrilib. Artıq Cənub Qaz Dəhlizi fərəhlənə biləcəyimiz layihədir. Eyni zamanda Cənub Qaz Dəhlizi nəhəng “Şahdəniz” qaz-kondensat yatağında hasilatı artırmağa imkan yaradıb. Bir il beş aydır ki, Azərbaycan həmin tamamilə yeni müasir infrastrukturdan öz qaz ehtiyatlarının nəqlində istifadə edir. Avropa qitəsində təbii sərvətlərimizlə bağlı fəaliyyətimizin genişləndirilməsi həm bizim, həm tərəfdaşlarımız üçün zəruridir. Azərbaycan hasilatın və ixracın artırılmasına nail olub. Ötən il Azərbaycan 22 milyard kubmetr təbii qaz ixrac etmişdir. Bu il bunun 24 milyard kubmetrə çatacağı gözlənilir. Gələn il isə bu göstərici daha çox olacaq. Nəzərə almaq lazımdır ki, Azərbaycanın qaz potensialı yalnız “Şahdəniz”lə məhdudlaşmır, digər yataqlar da çox perspektivlidir. Gələn il onların bəzilərində hasilat başlayacaq. Bu da enerji təhlükəsizliyinə mühüm töhfə olacaq. O da nəzərə alınmalıdır ki, xüsusən indiki dövrdə Azərbaycanın karbohidrogenlərinə olan tələbat heç zaman görünmədiyi kimi böyükdür. Prezidentin də qeyd etdiyi kimi, məsuliyyətli ölkə kimi biz bunu nəzərə alırıq və müxtəlif səbəblərə görə çətinliklərlə üzləşən ölkələri dəstəkləməyə çalışırıq. Bir məqam da nəzərə alınmalıdır. Cənub Qaz Dəhlizi üç boru kəmərindən ibarət vahid boru kəmərləri sistemidir. Onun sonuncu hissəsi – Trans-Adriatik boru kəmərinin buraxıcılıq qabiliyyəti 10 milyard kubmetrdir. İndi isə biz onun genişləndirilməsi haqqında düşünürük, çünki buna ehtiyac var. Əlbəttə, bu, vaxt və çoxlu maliyyə vəsaitlərini, o cümlədən sıx əlaqələndirməni, əməkdaşlığı və bütün iştirakçı ölkələrlə fəal dialoqu tələb edəcək. Azərbaycan buna hazırdır. Prezident İlham Əliyev artıq Azərbaycanın Energetika Nazirliyi və Dövlət Neft Şirkətinə müvafiq təlimatlar verib və onlar fəal danışıqlar aparırlar”.

Tahir Mirkişili yenilənən enerji sahəsində Azərbaycanın bir çox aparıcı enerji şirkətləri ilə fəal danışıqlar mərhələsində olduğunu xatırladıb. Bu sahədə Xəzər dənizinin nəhəng potensialı var. Xəzər dənizinin Azərbaycan sektorunun potensialı 150 min meqavat təşkil edir ki, bu, nəhəng həcmdir: “Digər tərəfdən, Zəngəzur dəhlizi yalnız yüklər üçün deyil, elektrik enerjisi üçün mühüm ixrac marşrutu ola bilər. Vaxtilə Azərbaycanın etibarlı tranzit ölkəsi kimi potensialını düzgün qiymətləndirməyənlər fikirlərini dəyişəcəklər. Şəxaləndirmə strategiyasına malik Azərbaycan xarici investisiya üçün olduqca cəlbedici ölkələrdəndir. Qarabağda və Zəngəzurda aparılan yenidənqurma işləri də Azərbaycanın iqtisadi potensialını daha da artıracaq”.

www.sumqayitxeber.com

Kateqoriyalar:
Etiketlər:
Şərhlər

Bir cavab yazın

Facebook Şərhlər
Bənzər Xəbərlər