«Azərikimya» İstehsalat Birliyinin Etilen-polietilen zavodunun ərazisindəki meydançada Ümumdünya Mülki Müdafiə günü münasibətilə «Mülki müdafiə və baş verə biləcək fəlakətlərin qarşısının alınmasına hazırlıq» mövzusunda geniş tədbir keçirilmişdir.
«Azərikimya» İB rəhbərliyinin, Fövqəladə Hallar Nazirliyinin Sumqayıt Regional İdarəsinin və Mülki Müdafiə şöbəsinin, həmçinin Birliyin tabeliyindəki idarə və müəssisələrin Fövqəladə hallar komissiyasının və hərbiləşdirilməmiş mülki müdafiə qüvvələrinin iştirak etdiyi tədbirdə mülki müdafiə sisteminin əhəmiyyəti, təhlükəsizlik xidmətləri kompleksində rolu, təbii fəlakətlərin, istehsalat qəzalarının və digər bədbəxt hadisələrin qarşısının alınması və nəticələrinin aradan qaldırılması ilə bağlı təlimatlar verilmişdir.
Sonra müəssisələrin hərbiləşdirilməmiş Mülki müdafiə qərargahına daxil olan xilasetmə dəstələrinin, sanitar məntəqələrinin, kimya-radiasiya müşahidə postlarının, qəza-bərpa manqalarının geyim və fərdi mühafizə vasitələrinin paylanma məntəqələrinin, yanğından mühafizə dəstələrinin və tibb manqalarının əmlak və avadanlıqlarına baxış keçirilmiş, şəxsi heyətin xidməti vəzifələri ilə bağlı bilikləri yoxlanılmış, onların hesabatları, rəy və təklifləri dinlənilmişdir.