Azərbaycan güclü dövlətdir

506
Müzəffər Ali Baş Komandan Cənab İlham Əliyevin rəhbərliyi ilə Ulu Öndər Heydər Əliyev tərəfindən müəyyənləşdirilmiş iqtisadi strategiyanı inamla davam etdirən Azərbaycan Respublikası öz dinamik inkişafında yeni mərhələyə qədəm qoymuşdur. Ölkəmizdə sosial-iqtisadi sahədə həyata keçirilən bütün tədbirlər yalnız bir məqsədə – Azərbaycan Respublikasında vətəndaşların daha layiqli həyat səviyyəsinin təmin edilməsinə xidmət edir. Son illərdə həyata keçirilən islahatlar vətəndaşlarımızın həyat səviyyəsinin daha da yüksəlməsinə öz əhəmiyyətli təsirini göstərməkdədir. Azərbaycanda həyata keçirilən dövlət siyasəti sosial-iqtisadi inkişafa və əhalinin sosial rifahının davamlı yüksəlişinə əlverişli zəmin yaradır.
Ölkəmizin şəhər və rayonlarının davamlı və tarazlı inkişafının təmin olunması məqsədilə qəbul edilmiş Azərbaycan Respublikası regionlarının sosial-iqtisadi inkişafı dövlət proqramlarının uğurlu icrası nəticəsində şəhər, qəsəbə və kəndlərimizin siması köklü şəkildə dəyişmiş, regionların iqtisadi potensialı artmış, infrastruktur təminatı, əhaliyə göstərilən dövlət xidmətlərinin keyfiyyəti, biznes və investisiya mühiti yaxşılaşmış, əhalinin rifah halı yüksəlmişdir. Ardıcıl olaraq həyata keçirilmiş məqsədyönlü islahatlar, genişmiqyaslı tədbirlər ölkəmizin iqtisadi və hərbi müdafiə qüdrətini daha da gücləndirərək 44 günlük Vətən müharibəsində parlaq qələbənin qazanılmasına güclü zəmin yaratmışdır.
Azərbaycan Respublikasının Prezidenti Cənab İlham Əliyevin 16 aprel 2024-cü il tarixində Hacıqabul rayonunda yenidən qurulacaq Şirvan suvarma kanalının təməlqoyma mərasimində iştirakı dövlət başçımızın regionların sosial-iqtisadi inkişafına çox böyük həssaslıqla yanaşmasının bariz göstəricisidir. Təməlqoyma mərasimində çıxış edən Cənab İlham Əliyev qeyd etdi ki, Azərbaycan dövləti güclü dövlətdir və öz gücünə, öz imkanlarına arxalanan dövlətdir. Azərbaycan Qarabağda və Şərqi Zəngəzurda elə genişmiqyaslı işlər görür ki, bunun dünyada misli-bərabəri yoxdur. İşğaldan azad edilmiş torpaqlarda quruculuq işləri ilə bərabər, kənd təsərrüfatının inkişafı da geniş vüsət almışdır.
Dövlət başçımız daha sonra əlavə etdi ki, vacib əhəmiyyət kəsb edən layihələrdən biri Xəzər dənizinin suyunun duzsuzlaşdırılmasıdır. Bu layihə həyata keçiriləndən sonra Xəzər dənizinin suyundan da həm suvarma üçün, həm içməli su kimi istifadə edəcəyik. Dünyanın bir neçə ölkəsi duzsuzlaşdırma sahəsində böyük təcrübəyə malikdir və bizim də Xəzər dənizi kimi böyük su hövzəmiz var. Prezident İlham Əliyev bildirdi ki, Hacıqabul rayonunda 4 mindən çox hektarda taxıl əkini aparılmışdır və məhsuldarlıq hər hektardan buğda üzrə 7 tona yaxın olmuşdur. Müqayisə üçün qeyd edək ki, ölkəmizdə orta məhsuldarlıq hər hektardan 3 tondan bir qədər çoxdur.
Bütün görülən işlər bizə gələcəyə böyük ümidlərlə baxmağa imkan verir. Dövlətimiz tərəfindən atılan bütün addımlar regionlarının sosial-iqtisadi inkişafı istiqamətində böyük perspektivlər açır. Müzəffər Ali Baş Komandan Cənab Prezident İlham Əliyevin müdrik rəhbərliyi ilə ölkəmiz iqtisadi inkişaf yollarında qətiyyətlə addımlayır.
Cavid Məmiyev,
YAP Sumqayıt şəhər təşkilatının sədr müavini

www.sumqayitxeber.com

Kateqoriyalar:
Etiketlər:
Şərhlər

Müzakirə qapadılmışdır.

Bənzər Xəbərlər