Masallının İkinci Yeddioymaq kəndində yaşadıqları dövrdə, 2013-cü ildən 2015-ci ilin oktyabr ayına qədər qızı Humra Nəhmətovanın, eləcə də qonşuların gözü qarşısında arvadının saçından tutub sürüyüb digər üsullarla fiziki və psixi zor tətbiq etməklə sifət nahiyəsinə çoxsaylı zərbələr vurmaqla amansız rəftar edib. Habelə arvadını əsaslı şübhələr olmadan, heç bir fakta əsaslanmadan gündəlik pul müqabilində əkin sahəsində işləməyə deyil, əxlaqsız hərəkətlər etmək üçün başqa şəxslərlə görüşə getməsini bəhanə gətirərək işləməyə qoymayıb, söyüb, təhqir edib.
Bu hərəkətlərdən Ülkər Nəhmətova bezərək dəfələrlə məcbur olub atası evinə gedərək orada qalıb. Ü.Nəhmətova ləyaqətinin mütəmadi olaraq alçalmasına dözməyərək uzun müddət davam edən fiziki və psixi təzyiqlərdən canını qurtarmaq üçün özünü öldürmə həddinə çatdırmış və nəticədə 17 oktyabr 2015-ci il tarixdə saat 19 radələrində yaşadığı evin arxa tərəfində yerləşən təndirxanada baş örtüyü ilə özünü asaraq intihar edib. Bundan başqa, Nəhmətov Daşqın Qurban oğlu 06 oktyabr 2015-ci il tarixdə saat 22 radələrində arvadı Ülkər Nəhmətova ilə yaşadığı evin həyətində uca səslə nalayiq ifadələr işlətməklə mübahisə etdikdən sonra silah qismində istifadə etdiyi mətbəx bıçağını götürüb arvadını əkin sahəsində işləməyə aparan həmkəndlisi Həsənova Nəzakət Əlihüseyn qızının qolundan tutub sonuncunun qonşuluqda yaşayan qaynı Həsənov Fəttah Həsən oğlunun evinə apararaq çoxsaylı qonşularının gözü qarşısında xuliqanlıq edib.

Masallı Rayon Məhkəməsinin hökmü ilə 1971-ci il təvəllüdlü Nəhmətov Daşqın Qurban oğlu Cinayət Məcəlləsinin 125 və 221.3-cü maddələri ilə təqsirli bilinib, 4 (dörd) il müddətə azadlıqdan məhrum edilib.