Azərbaycanın müasir tarixində elə hadisələr var ki, onların əhəmiyyəti yalnız baş verdiyi dövrlə məhdudlaşmır, gələcək nəsillərin taleyini də müəyyən edir. 15 İyun – Milli Qurtuluş Günü məhz belə tarixi hadisələrdəndir. Bu gün Azərbaycan dövlətçiliyinin qorunub saxlanılması, müstəqilliyimizin möhkəmləndirilməsi və ölkəmizin gələcək inkişaf strategiyasının müəyyənləşdirilməsi baxımından müstəsna əhəmiyyət daşıyır. Tarix sübut etdi ki, 1993-cü ilin iyununda verilən qərarlar təkcə bir siyasi böhranın aradan qaldırılması deyil, bütöv bir dövlətin gələcəyinin xilas edilməsi demək idi.
XX əsrin sonlarında Azərbaycan mürəkkəb və ziddiyyətli proseslərlə üzləşmişdi. Müstəqilliyini yenicə bərpa edən ölkə həm xarici təcavüzün, həm də daxili siyasi qarşıdurmaların ağır nəticələrini yaşayırdı. Dövlət idarəetməsində yaranmış boşluq, iqtisadi böhran, cəbhədəki uğursuzluqlar və müxtəlif silahlı qruplaşmaların fəaliyyəti ölkədə ciddi təhlükələr yaratmışdı. Azərbaycan faktiki olaraq parçalanma və vətəndaş qarşıdurması həddinə gəlib çatmışdı. Belə bir zamanda xalqın əsas arzusu ölkəni bu böhrandan çıxara biləcək güclü və təcrübəli liderin hakimiyyətə qayıdışı idi.
1993-cü ilin iyun hadisələri Azərbaycanın taleyində həlledici rol oynadı. Xalqın təkidli tələbi ilə Bakıya qayıdan Ümummilli Lider Heydər Əliyev qısa müddət ərzində ölkədə vəziyyəti nəzarət altına almağa nail oldu. Onun siyasi təcrübəsi, qətiyyəti və uzaqgörənliyi sayəsində dövlətçiliyə qarşı yönəlmiş təhlükələrin qarşısı alındı. İyunun 15-də Ali Sovetin sədri seçilməsi ilə Azərbaycanın yeni inkişaf mərhələsinin əsası qoyuldu. Sonrakı hadisələr göstərdi ki, bu tarix təsadüfi deyil, xalqın gələcəyini müəyyən edən strateji seçim idi.
Milli Qurtuluşun ən mühüm nəticələrindən biri ölkədə sabitliyin bərpa olunması oldu. Çünki sabitlik olmadan nə dövlət quruculuğu, nə iqtisadi inkişaf, nə də beynəlxalq əməkdaşlıq mümkün idi. Heydər Əliyevin rəhbərliyi ilə həyata keçirilən tədbirlər nəticəsində qanunçuluq möhkəmləndirildi, dövlət institutları formalaşdırıldı, vətəndaşların öz dövlətinə olan inamı bərpa edildi. Azərbaycan ilk dəfə olaraq uzunmüddətli inkişaf strategiyası üzərində qurulan idarəetmə modelinə sahib oldu.
Qurtuluşdan sonra həyata keçirilən iqtisadi və siyasi islahatlar ölkənin inkişafının əsasını təşkil etdi. Xarici sərmayələrin cəlb olunması, enerji siyasətinin düzgün müəyyənləşdirilməsi, beynəlxalq əlaqələrin genişləndirilməsi Azərbaycanın regionun aparıcı dövlətlərindən birinə çevrilməsinə imkan yaratdı. Dünyanın aparıcı dövlətləri və beynəlxalq təşkilatları Azərbaycanı etibarlı tərəfdaş kimi qəbul etməyə başladılar. Müstəqil xarici siyasət kursu ölkəmizin beynəlxalq nüfuzunun artmasına mühüm töhfə verdi.
Heydər Əliyevin dövlətçilik fəlsəfəsinin əsas sütunlarından biri milli həmrəylik ideyası idi. O hesab edirdi ki, xalqın birliyi dövlətin gücünün əsas mənbəyidir. Məhz bu siyasət nəticəsində Azərbaycanda sabit ictimai-siyasi mühit formalaşdı, müxtəlif təbəqələr ümummilli məqsədlər ətrafında birləşdi. Bu birlik sonrakı illərdə ölkənin qarşısında duran ən mühüm vəzifələrin yerinə yetirilməsində həlledici rol oynadı.
Bu gün Azərbaycanın əldə etdiyi uğurların kökündə məhz Milli Qurtuluşun yaratdığı möhkəm təməl dayanır. Prezident İlham Əliyevin rəhbərliyi ilə həyata keçirilən siyasət nəticəsində ölkəmiz regionun ən güclü dövlətlərindən birinə çevrilib. Ərazi bütövlüyünün və suverenliyin tam bərpa olunması, Qarabağda və Şərqi Zəngəzurda aparılan genişmiqyaslı quruculuq işləri, beynəlxalq aləmdə artan nüfuz Azərbaycanın keçdiyi inkişaf yolunun parlaq göstəricisidir. Bu nailiyyətlər Ulu Öndərin müəyyən etdiyi strateji kursun uğurlu davamının nəticəsidir.
Milli Qurtuluş Günü bu gün yalnız keçmişə ehtiram deyil, həm də gələcəyə inamın ifadəsidir. 15 İyun Azərbaycan xalqının dövlətçilik iradəsinin, milli birliyinin və müstəqillik əzminin təcəssümüdür. Tarixə nəzər saldıqda aydın görünür ki, həmin gün qəbul edilən qərarlar Azərbaycanı böhrandan tərəqqiyə, qeyri-müəyyənlikdən sabitliyə, zəiflikdən gücə aparan yolun başlanğıcı olmuşdur. Məhz buna görə də Milli Qurtuluş Günü xalqımızın yaddaşında dövlətçiliyimizin xilası və müasir Azərbaycanın yüksəlişinin başlanğıcı kimi yaşayır.
Şəbnəm Əliyeva, Sumqayıtın Tarixi Muzeyinin kiçik elmi işçisi
Müzakirə qapadılmışdır.