Sumqayıtlı blogger Nailə Cəfərova öz blogunda (nailacafarova.wordpress.com) şəhər həyatı ilə bağlı maraqlı mövzulara toxunub. Yazıların aktuallığını nəzərə alaraq saytımızda yerləşdiririk:

Mən Sumqayıtın Katec adlı məhəlləsində yaşayıram. Məhəlləmiz şəhər səs-küyündən bir az uzaqdır. İşə gedib-gəlmək üçün çox vaxt sərf edərəm. Vaxtsa qızıldır. Nə qədər vaxta qənaət etməyə çalışsam da, alınmır… Amma qonşularım bunu çox gözəl bacarır. Öyrənməyə dəyər…

Umumiyyətlə məhəlləmizin sakinləri sakit və zəhmətkeşdir. Hərənin başı öz işinə elə qarışıb ki, qonşunun qeybətini etməyə belə vaxtları yoxdur. Vaxta çox qənaətcildirlər. O qədər vaxta qənaitcildirlər ki, zibil paketini zibil kanteynerinə atmağa vaxt sərf etməmək üçün qonşu qapısına, yol kənarına atmağı ən səmərəli variant hesab edirlər. Məncə bu tibbi cəhətdən də xeyirlidir. Çünki zibili atarkən qonşu səni görər deyə o qədər həyəcanlanırsan ki, qanda adrenalin də artır.

Bu fotoda gördüyünüzü plastik qabların qəbul məntəqəsilə səhv salmayın! Bu da bizim məhəllədən keçən Acı-dərəsi yarğanıdır. 8 km uzunluğa malik olan bu yarğan şəhərin qrunt sularını Xəzərə axıdır. Sağ və sol sahilində yerləşən ev sakinləri isə məişət tullantılarını bura atmaqla kifayətlənməyib, kanalizasiya sularını da bu dərəyə axıdırlar. Əgər internet vasitəsilə bu mənzərənin qoxusunu hiss etmək imkanı olsaydı, yəqin ki, indi otağı tərk etmiş olardınız. Məncə ən qənaətcil sakinlər bu ərazidə yaşayanlardır.

www.sumqayitxeber.com