“Sumqayıt”ın Konfrans Liqasındakı ilk oyunun vaxtında dəyişiklik edilib.
“Qafqazinfo” xəbər verir ki, bu haqda rəqib Serbiyanın “Çukariçki” klubunun saytı məlumat yayıb. Bu komandalar arasında Konfrans Liqasının II təsnifat mərhələsinin iyulun 22-də səfərdə keçirilməli olan ilk oyunu bir gün əvvələ, iyulun 21-nə keçirilib.
Buna səbəb həmin gün ölkənin digər klubu “Partizan”ın da Konfrans Liqasında Slovakiyanın “Dunayska Streda” komandası ilə ev oyununa çıxmasıdır. UEFA-nın qaydalarına əsasən, bir ölkənin iki komandası eyni gündə evdə avrokubok matçı oynaya bilməz.
Qeyd edək ki, komandalar arasında cavab oyunu iyulun 29-da Sumqayıtdakı “Kapital Bank Arena”da olacaq.