Sumqayıt Regional Mədəniyyət İdarəsinin tabeliyində olan Nizami Gəncəvi adına Kitabxana Klubun əməkdaşları şəhid ailəsinə baş çəkib, ailənin qayğıları ilə maraqlanıblar.
İdarədən AZƏRTAC-a bildirilib ki, Sumqayıtın mədəniyyət işçiləri bu dəfə şəhərin Corat qəsəbəsinə yollanıb, şəhid Müşfiq Abbas oğlu Bəktiyevin ailəsini ziyarət ediblər.
Şəhidimiz Sumqayıt şəhər Corat qəsəbəsində 2002-ci il yanvarın 24-də anadan olub. O, 2008-ci ildə Sumqayıt şəhər Corat qəsəbəsində 7 nömrəli tam orta məktəbdə təhsilə başlayıb. Sonra təhsilini 10 saylı peşə liseyində elektrik qaz qaynaqçısı olaraq davam etdirib. Lakin təhsilini yarımçıq qoyaraq, 2020-ci il yanvarın 27-də Qusar rayonunda hərbi xidmətə yollanıb.
2020-ci il sentyabrın 27-də İkinci Qarabağ müharibəsi başladıqda o da yoldaşları ilə birlikdə döyüşlərə qatılıb. Müşfiq Füzuli, Cəbrayıl uğrunda gedən döyüşlərdə iştirak edib. 2020-ci il oktyabrın 20-də Xocavənd istiqamətində gedən döyüşlərdə şəhidlik zirvəsinə yüksəlib.
M.Bəktiyev ölümündən sonra “Xocavəndin azad olunmasına görə”, “Füzulinin azad olunmasına görə”, “Cəbrayılın azad olunmasına görə” və “Vətən uğrunda” medalları ilə təltif olunub.
