Azərbaycan Dövlət Su Ehtiyatları Agentliyinin tabeliyindəki Tikilməkdə Olan Obyektlərin Müdiriyyəti tərəfindən Sumqayıt şəhərində kanalizasiya və yağış suları sisteminin yenidən qurulması ilə bağlı işlərə başlanılır.
Sumqayıtı Milli Məclisdə təmsil edən millət vəkili Tahir Mirkişili sumqayitxeber.com-a açıqlamasında bildirib ki, kanalizasiya və yağış suları sisteminin yenidən qurulması layihəsi şəhərin infrastrukturunun modernləşdirilməsi baxımından strateji bir addımdır: “Bu layihənin icrası üçün ayrılan 41,5 milyon manatlıq investisiya həm şəhərin ekoloji mühitinin yaxşılaşdırılmasına, həm də sosial-iqtisadi inkişafına xidmət edəcək. Layihə çərçivəsində ilk olaraq “Acı dərə” kanalının trassası boyunca sistemlərin yenidən qurulması nəzərdə tutulur ki, bu da illərlə mövcud olmuş problemlərin həllinə gətirib çıxaracaq. Yağış sularının səmərəli idarə olunması, suyun təmizlənməsi və tullantıların ekoloji normativlərə uyğun şəkildə təmizlənməsi şəhər əhalisinin rifahına və ətraf mühitin qorunmasına müsbət təsir göstərəcək”.
Tahir Mirkişili vurğulayıb ki, Sumqayıt şəhəri tarixən dinamik inkişaf edən sənaye mərkəzi kimi tanınıb. Lakin bu şəhərin uzun illərdən bəri həllini gözləyən ekoloji problemləri də olub. Onlardan biri – “Acıdərə” kanalının boruya alınması layihəsi artıq uğurla davam etdirilir. Bu problemin həll olunması şəhər sakinlərinin sağlam həyat şəraitinin təmin olunması baxımından xüsusi önəm daşıyır.
Millət vəkili qeyd edib ki, şəhərin artan əhali sayı və sənaye potensialı infrastrukturun müasir tələblərə uyğunlaşdırılmasını zəruri edir. Bu cür layihələr şəhərin investisiya cəlbediciliyini artırır, yeni iş yerlərinin yaranmasına səbəb olur və Sumqayıtı dayanıqlı inkişaf baxımından daha da gücləndirir.
“Bu layihə Prezident İlham Əliyevin rəhbərliyi ilə aparılan davamlı ekoloji siyasətin uğurlu bir nümunəsidir. Əminəm ki, görüləcək işlər yalnız bu günümüz üçün deyil, həm də gələcək nəsillər üçün əhəmiyyətli nəticələr verəcəkdir”,- deyə Tahir Mirkişili əlavə edib.

www.sumqayitxeber.com