İyunun 5-də Sumqayıt Dövlət Universitetində (SDU) Ümumdünya Ətraf Mühit Gününə həsr olunmuş ekoloji maarifləndirmə tədbiri keçirilib. Tədbir çərçivəsində universitet ərazisində təmizlik aksiyası təşkil olunub. Aksiya zamanı tələbələr universitetin həyətində və ətraf ərazilərdə təmizlik işləri aparıb, tullantıları toplayaraq ərazini təmizləyiblər.
Tədbirdə çıxış edən Sosial məsələlər və ictimaiyyətlə əlaqələr üzrə prorektor, dosent Elmar Xəlilov Ümumdünya Ətraf Mühit Gününün əhəmiyyətindən bəhs edərək ətraf mühitin qorunmasının hər bir vətəndaşın üzərinə düşən mühüm məsuliyyət olduğunu vurğulayıb. O, bu istiqamətdə ölkəmizdə həyata keçirilən dövlət siyasətinin və ekoloji təhlükəsizliyin təmin olunmasına xidmət edən strateji təşəbbüslərin mühüm əhəmiyyət daşıdığını qeyd edərək, hər kəsi təbiətin qorunmasına daha həssas yanaşmağa çağırıb.
Sonra Mühəndislik fakültəsinin Kimya mühəndisliyi və Ekologiya kafedrasının dosenti Nərgiz Aşurova çıxışında tullantıların düzgün idarə olunmamasının ekosistemlərə, su və torpaq ehtiyatlarına ciddi ziyan vurduğunu bildirib. O, xüsusilə elektron və plastik tullantıların ekoloji tarazlığa mənfi təsir göstərdiyini qeyd edərək, ekoloji problemlərin həllində maarifləndirmənin, tullantıların çeşidlənməsi və təkrar emalın əhəmiyyətindən danışıb.
Aksiyanın sonunda universitetinin rektoru, texnika elmləri doktoru, professor Nurəli Yusifbəyli çıxış edərək ətraf mühitin qorunmasının hər bir vətəndaşın üzərinə düşən mühüm vəzifə olduğunu vurğulayıb. Rektor bildirib ki, Azərbaycan bərk məişət tullantılarının emalı sahəsində post-sovet məkanında qabaqcıl ölkələrdən biridir. Ölkə Prezidenti İlham Əliyevin təşəbbüsü ilə yaradılan müasir tullantıların emalı kompleksi bu sahədə mühüm nailiyyətlərdən hesab olunur. O vurğulayıb ki, kompleksə yatırılan investisiyalar nəticəsində hər il yüz minlərlə ton tullantı emal olunur və bundan 280 milyon kilovat-saat elektrik enerjisi istehsal edilir. Rektor çıxışında onu da qeyd edib ki, o, 2012-ci ildə iribuynuzlu heyvan tullantılarından bioqaz, elektrik enerjisi və üzvi gübrə istehsalına dair layihə ilə ölkə üzrə keçirilən müsabiqədə qalib olub.
Rektor aksiyanın təşkilatçılarına təşəkkürünü bildirərək belə tədbirlərin davamlı inkişaf məqsədlərinin həyata keçirilməsinə xidmət etdiyini vurğulayıb.
Müzakirə qapadılmışdır.