“Həmin müşavirədə projektorun işığı gözümü deşirdi”.
Bunu big.az-a açıqlamasında Dağlıq Qarabağın Azərbaycanlı İcmasının sədri, Şuşa Rayon İcra Hakimiyyətinin başçısı Bayram Səfərov deyib.
Bayram Səfərov icra başçı vəzifəsindən uzaqlaşdırılacağı ilə bağlı yayılan informasiyalara da toxunub. O, bildirib ki, vəzifədə olsa da, olmasa da ölkə başçısının sadiq xidmətçisi olacaq: “Məni vəzifəyə ölkə başçısı təyin edib, o da istədiyi vaxt kənarlaşdıracaq. Mən vəzifədə olsam da, olmasam da ölkə başçısının sadiq əsgəriyəm. Yayılan xəbərlər mahiyyətsizdir, ölkə başçısı kimisə vəzifədən kənarlaşdıran zaman heç kimdən məsləhət almır”.
Qeyd edək ki, yanvarın 29-da Heydər Əliyev Mərkəzində “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının dördüncü ilinin yekunlarına həsr olunan konfrans keçirilib. Unikal.org saytının yaydığı məlumata görə, Prezident İlham Əliyevin müşavirədə çıxışı zamanı Bayram Səfərovu yuxu tutub və o, mürgüləməyə başlayıb.
