Xəbər verdiyimiz kimi, bu gün Prezident İlham Əliyevin sərəncamı ilə Vüqar Əhəd oğlu Süleymanov Azərbaycan Respublikasının Minatəmizləmə Agentliyinin İdarə Heyətinin sədri təyin edilib.
Azvision.az -ın məlumatına görə, V.Süleymanov bundan öncə Ekologiya və Təbii Sərvətlər Nazirliyində Aparat rəhbəri vəzifəsində çalışıb.
O, 7 may 1965-ci ildə anadan olub. M.V.Lomonosov adına Moskva Dövlət Universitetinin tarix fakültəsi və Azərbaycan Dövlət İqtisad Universitetinin xarici iqtisadi əlaqələr sahəsində iqtisadçı ixtisasını bitirib.
V.Süleymanov 1988-ci ildən 1994-cü ilədək Bakı Dövlət Universitetində elmi-pedaqoji fəaliyyətlə məşğul olub. 1994-2002-ci illərdə özəl təşkilatlarda çalışıb.
2002-2005-ci illərdə Azərbaycan Respublikası Ərazilərinin Minalardan Təmizlənməsi üzrə Milli Agentlikdə (ANAMA) Partlamamış hərbi sursat əməliyyatları üzrə mütəxəssis, 2005-2018-ci illərdə özəl təşkilatlarda işləyib.
2018-2020-ci illərdə Ekologiya və Təbii Sərvətlər Nazirliyində baş məsləhətçi, şöbə müdiri olub. 21.04.2020-ci il tarixdən bugünkü təyinatadək Ekologiya və Təbii Sərvətlər Nazirliyinin Aparat rəhbəri olub.
Ailəlidir, 3 övladı var.