Azərbaycanda 2026-cı ilin “Şəhərsalma və Memarlıq İli” elan edilməsi ölkədə bu sahəyə verilən strateji əhəmiyyətin bariz göstəricisidir. Son illərdə həyata keçirilən kompleks islahatlar fonunda Sumqayıt şəhəri də şəhərsalma və memarlıq sahəsində dinamik inkişaf edən mərkəzlərdən birinə çevrilib.
Sənaye şəhəri kimi formalaşan Sumqayıt artıq yalnız istehsal potensialı ilə deyil, həm də müasir urbanistik yanaşmaların tətbiqi ilə seçilir. Şəhərdə aparılan yenidənqurma və abadlıq işləri nəticəsində yaşayış mühiti əhəmiyyətli dərəcədə yaxşılaşıb, yeni yaşayış kompleksləri, sosial infrastruktur obyektləri və ictimai məkanlar yaradılıb.
Son illərdə həyata keçirilən layihələr çərçivəsində park və xiyabanlar yenilənib, yaşıllıq zolaqları genişləndirilib, küçə və prospektlər müasir standartlara uyğun şəkildə yenidən qurulub. Eyni zamanda, şəhərin sahilboyu ərazilərində aparılan abadlıq işləri Sumqayıtı həm sakinlər, həm də qonaqlar üçün daha cəlbedici məkana çevirib.
Memarlıq baxımından da şəhərdə müasirlik və funksionallıq prinsipləri ön plana çəkilir. Yeni tikililərdə estetik görünüşlə yanaşı, enerji səmərəliliyi və dayanıqlılıq kimi meyarlar nəzərə alınır. Bununla yanaşı, mövcud binaların əsaslı təmiri və fasadların yenilənməsi şəhərin ümumi memarlıq simasını müasirləşdirir.
Şəhərsalma siyasətinin mühüm istiqamətlərindən biri də sosial infrastrukturun gücləndirilməsidir. Yeni məktəblər, uşaq bağçaları, səhiyyə və mədəniyyət müəssisələrinin inşası şəhər sakinlərinin həyat keyfiyyətinin yüksəldilməsinə xidmət edir.
2026-cı ilin “Şəhərsalma və Memarlıq İli” elan edilməsi Sumqayıtda bu sahədə görülən işlərin daha da sürətlənəcəyini göstərir. Qarşıdakı dövrdə şəhərin planlı inkişafı, müasir şəhər mühitinin formalaşdırılması və dayanıqlı urbanizasiya prinsiplərinin tətbiqi istiqamətində yeni layihələrin icrası gözlənilir.
Bütün bunlar Sumqayıtın gələcəkdə ölkənin ən müasir və rahat şəhərlərindən birinə çevriləcəyini deməyə əsas verir.
sumqayitxeber.com son 10 ildə Sumqayıtın inkişafını əks etdirən FOTOLARI tədim edir:
https://sumqayitxeber.com/files/uploads/2019/09/yollar.jpg
Müzakirə qapadılmışdır.