Sumqayıt Regional Mədəniyyət İdarəsi, Sumqayıt Dövlət Rəsm Qalereyasının təşkilatçılığı ilə Sumqayıt şəhər Heydər Əliyev Mərkəzində Azərbaycanda 2022-ci ilin “Şuşa İli” elan olunması ilə bağlı “Qarabağın tacı – Şuşa” adlı peşəkar rəssamların rəsm və dekorativ -tətbiqi sənət ustalarının əl işlərindən ibarət sərgi təşkil edilib.

Sərgidə Sumqayıt, Şuşa, Xızıdan olan ümumilikdə 33 sənət adamının 100-dən çox rəsm, əl işləri və xalq tətbiqi sənət nümunələri nümayiş olunub.

Sərginin keçirilməsində əsas məqsəd milli mənəvi dəyərlərimizi özündə yaşadan, Şuşanın zəngin mədəniyyətini, tarixini, təbiətini tanıtmaq, təbliğ etmək, yetişməkdə olan gənc nəslə çatdırmaqdır.

Sərgidə Milli Məclisin deputatı Müşfiq Məmmədli, Sumqayıt Şəhər İcra Hakimiyyəti başçısının birinci müavini Teymur Səmədov, Sumqayıt Şəhər İcra Hakimiyyəti başçısının müavini Ülviyyə Müzəffərova, Sumqayıt Regional Mədəniyyət İdarəsinin rəisi Rəşad Əliyev, şəhid anaları, müəssisə, təşkilat rəhbərləri və ziyalılar iştirak ediblər.

Sumqayıt Şəhər İcra Hakimiyyəti başçısının 1-ci müavini Teymur Səmədov çıxıç edərək ilk növbədə böyük qələbəyə,  zəfərə gələn yolda baş verən ictimai siyasi prosesləri, beynəlxalq əhəmiyyətli lahiyələrin fundamentallığından bəhs edib. Şuşa şəhərinin Azərbaycanın düşüncəsində milli məfkurədə hansı önəmli yerə malik olmasını vurğulayıb.

Milli Məclisin deputatı Müşfiq Məmmədli yeni dünya nizamında çağdaş siyasi proseslerə təsir etmək qüdrətinə malik Azərbaycanın düşünülmüş milli manefəyə yönəlik inkişaf strategiyasından danışıb. Dövlət başçısı İlham Əliyevin müdrik xarici siyasi konsepsiyasını vurğulayıb. Möhtəşəm qələbədən sonra bütün sahələrdə o cümlədən mədəniyyət sferasında yeni mərhələyə uğurlu keçidini qeyd edib.

Sumqayıt Regional Mədəniyyət İdarəsinin rəisi Rəşad Əliyev zəfər bayramı və bayraq gününün təntənəsi işığında Şuşaya həsr olunan sərginin keçirilməsinin xüsusi önəm kəsb etdiyini bildirib.

Yazıçı, dramaturq, kulturoloq Hafiz Ataxanlı yaranan hər yeni əsərin zamanın palitrasına rəng qatdığını qeyd edib, və bu gün möhtəşəm sərgidə düzənlənən sənət nümunələrinin də qalibiyyət zamanı xidmət etdiyini bildirib.

Şəhid Elmar Nəsibovun anası Sürəyya Mehdiyeva şəhid ailələrinə dövlət başçısı İlham Əliyevin və şəhər rəhbərliyinin göstərdiyi diqqət və qayğısına görə minnətdarlığını bildirib.

Sumqayıt Dövlət Rəsm Qalereyası tərəfindən şəhid anası Sürəyya Mehdiyevaya “Xarı Bülbül” nişanı və çiçək dəstəsi təqdim edilib. Tədbirin sonunda idarə rəisi sərgidə iştirak edən rəssam və sənətkarlara təşəkkürnamələr təqdim edərək, onlara uğurlar arzulayıb.

Sərgidə həmçinin Sumqayıt Musiqi kollecinin müəllimləri Könül Bəkirova və Şəms Əliyevanın rəhbərliyi ilə kamera ansamblının kollektivi və Şuşa Mədəniyyət evinin nəzdində fəaliyyət göstərən Türkanə Bayramovanın rəhbərlik etdiyi “Buta rəqs” qrupu musiqi nömrələri ilə çıxış ediblər.