2016-cı il Aprel döyüşlərində övladını Vətən uğrunda itirənlərdən biri də Bayramovlar ailəsidir.
Şəhid Şulan Bayramov 1996-cı ilin iyulun 28-də Sumqayıt şəhərində anadan olub. Orta məktəbi bitirən Şulan Bayramov bir il sonra, 2014-cü ildə Azərbaycan Dəniz Balıq Sənayesi Kollecinə daxil olub. Lakin o, təhsilini donduraraq hərbi xidmətə gedib.
Ailədə iki qardaş olublar. Şulan hərbi xidmətini başa vurduğu zaman qardaşı dörd ayın əsgəri olub.
Şəhidin anası Türkanə Bayramova Oxu.Az-a müsahibəsində deyib ki, 18 il əziyyətlə böyütdüyü oğlunun üzünə, qoxusuna həsrət qalıb:
“Şulan əsgər gedən gün bir kəlmə dedi ki, anam mənim yanıma gəlməsin. O sözdən sonra 1 il 6 ay mən bir dəfə də olsun oğlumu görmədim. Bütün valideynlər uşaqlarının andiçmə mərasiminə qatıldı. Şulan mənə icazə vermədi.
İnanırsınız, bu müddət ərzində hələ də mən qapı döyüləcək, Şulan gələcək deyə gözləyirəm. Üç ildir həsrətim, ürəyimin yanğısı keçmir”.
Şəhid Şulan Bayramovun hekayəsində hər kəsi dəhşətə gətirən bir məqam var. Anası deyir ki, sinif yoldaşlarından biri oğlunun məzun köynəyinin üzərinə “Səni şəhid olasan!” yazıb:
“Məzun günü evə gəldi. Köynəyinə baxanda gördüm ki, yazıblar, “Səni görüm şəhid olasan”. Anayam, ürəyim dağlandı, ağladım. Soruşdum, bunu kim yazıb, niyə yazıb? Dedi, dostu yazıb. Şulan əsgər gedəcəyini biləndə evdə bütün paltarlarını, əşyalarını yığıb dost-tanışlarına hədiyyə etmişdi.
Elə bil hiss edirdi ki, daha geri qayıtmayacaq. Mənə gözdağı olacaq heç nə saxlamadı. Şulan çox dəliqanlı, kişi qeyrətli oğlan idi. Ailəcanlı, istiqanlı oğul idi. Aprelin 3-ü oğlum təxris olunub evinə gəlməli idi. Onun yolunu necə həsrətlə gözləyirdim, amma özü yox, buz kimi soyuq bədənini gətirdilər”.
Oxu.Az və Baku TV-nin şəhid Şulan Bayramov haqqında hazırladığı süjeti təqdim edirik:
Könül Cəfərli
FOTO/VİDEO: Valeh Arifoğlu