Azərbaycanın müasir tarixində elə hadisələr olub ki, onlar yeni bir mərhələnin başlanğıcı kimi dövlətçiliyimizin salnaməsinə əbədi həkk olunub. Belə hadisələrdən biri xalqımızın dahi oğlu, Ulu Öndər Heydər Əliyevin 1993-cü ilin iyun ayında öz xilaskarlıq missiyasını yerinə yetirmək üçün xalqın tələbi ilə hakimiyyətə gəlişidir. Heydər Əliyevin 1993-cü il iyun ayının 15-də Ali Sovetin Sədri seçilməsi ilə başlanan xilaskarlıq missiyası bu gün qürurla fəxr etdiyimiz güclü Azərbaycan dövlətinin qurulması ilə nəticələndi.
1993-cü ilin təlatümlü iyun günlərində Azərbaycanda cərəyan edən siyasi-hərbi proseslərin və vətəndaş qarşıdurmasının nəticə etibarilə dövlətimizin parçalanması və ya müstəqilliyimizin itirilməsi ilə məntiqi sonluğa çatması qaçılmaz idi. Hadisələrin axarını, siyasi çəkişmələrin və artıq hərbi müstəviyə qədəm qoymuş hakimiyyət uğrunda mübarizənin gedişatını başqa cür proqnozlaşdırmaq sadəcə mümkün deyildi. Müstəqilliyimizin yeni qazanılması, müharibə vəziyyətində olmağımız tamamilə fərqli bir siyasət yürüdülməsini, xüsusən dövlətçiliyimizin və müstəqilliyimizin möhkəmləndirilməsi üçün təxirəsalınmaz addımların atılmasını zəruri etsə də, hakimiyyətdə olan AXC-Müsavat cütlüyü tamamilə fərqli yol tutmuşdu. Dövlətçilik anlayışı sanki onlara yad idi.
Xalqın sabaha inamı itsə də, ümidlər tükənməmişdi. Buna səbəb isə Heydər Əliyev faktoru idi. O dövrdə Yeni Azərbaycan Partiyasının yaradılması, cəmiyyətin bütün zümrələrinin nümayəndələrinin Heydər Əliyevə müraciəti məhz Ulu Öndərə olan inamdan irəli gəlirdi. Böyükdən kiçiyə kimi hər kəs əmin idi ki, Heydər Əliyevin siyasi hakimiyyətə gəlişi ilə ölkəmizin başı üzərini almış təhlükələr sovuşacaq, hərbi-siyasi böhran başa çatacaq. Heydər Əliyev də Bakıya gəlişinin əsas qayəsini, mənasını, ilk növbədə, xalqın ən böyük sərvəti saydığı müstəqilliyin qorunub saxlanmasında, ölkəni başına götürmüş böhranın aradan qaldırılmasında görürdü. Hətta siyasi böhran dərinləşdikcə başlarını itirmiş iqtidar təmsilçiləri də dərk edirdilər ki, Heydər Əliyev təcili Bakıya gəlib proseslərə müdaxilə etməsə, dövləti və xalqı fəlakətdən qurtarmaq mümkün olmayacaq.
İyunun 9-da Naxçıvandan Bakıya gələn Heydər Əliyev öz müdrikliyi ilə cəmi bir neçə günə ölkədə vəziyyətin nisbətən sabitləşməsinə nail oldu. İyun ayının 15-də isə Ulu Öndərin Ali Sovetin Sədri seçilməsi xalqımızın milli qurtuluşunun təməlini qoydu. Aradan illər ötdükcə Azərbaycan daha da gücləndikcə, inkişaf etdikcə, Heydər Əliyevin o ağır dövrdə gördüyü işlərin mahiyyətini, məzmununu, mürəkkəb şəraitdə hansı çətinliklərə qalib gəldiyini daha dərindən anlayırıq. Bəli, Heydər Əliyev hər siyasətçinin edə bilmədiyi tarixi bir missiyanı qətiyyətlə yerinə yetirdi, dövlətçiliyimizi və müstəqilliyimizi bütün təhlükələrdən xilas etdi.
Heydər Əliyev müstəqil dövlətçiliyimizin təməllərini yaratdı və öz tarixi xilaskarlıq missiyasının nəticəsində müasir Azərbaycan dövlətinin banisi oldu. Bu gün dövlətimiz möhtərəm İlham Əliyevin rəhbərliyi ilə Ulu Öndərin müəyyən etdiyi yolla inamla irəliləyir, tarixini yeni uğurlarla zənginləşdirir. Ötən il Vətən müharibəsində qazanılan qələbə, ərazi bütövlüyümüzün bərpası da Heydər Əliyev ideyalarının davamının nəticəsidir. Bu gün hər birimiz haqlı olaraq dövlətimizin inkişafı, nailiyyətləri və qələbələri ilə fəxr edir, öyünürük. Vətən müharibəsindəki Qələbədən sonra isə Milli Qurtuluş Gününü daha böyük qürur hissi ilə qarşılayırıq.
Müşfiq MƏMMƏDLİ,
Milli Məclisin deputatı