Bu ilin avqust ayı ərzində Azərbaycanda körpələrə qoyulan yeni adlar məlum olub.
Nazirlər Kabineti yanında Terminologiya Komissiyasının sədr müavini, professor Sayalı Sadıqova bildirib ki, komissiyanın nəzdində yaradılmış Adlar və Soyadlar üzrə Xüsusi Komissiyaya Ədliyyə Nazirliyinin qeydiyyat şöbələrindən ötən ay üzrə daxil olan adlar arasında 26-sı yenidir.
Onun sözlərinə görə, yeni adların hamısına müsbət cavab verilib və körpələrə qoyulmasına etiraz edilməyib.
S.Sadıqova bildirib ki, valideynlər tərəfindən körpələrə qoyulan 26 yeni ad məqsədəuyğun sayılıb:
“Yusel, Sürhan, Rəşih, Tamay, Timurtay, Tərlavə, Təhliğə, Tuncalp, Yalkut, Varəsə, Qövsi, Yıldır, Mahsurət, Mövlidə, Rəfahəddin, Rəvayi, Rəfal, Selcuq, Səmagül, Varidə, Şahturan, Səmərruh, Züşdiyyə və s. adları avqust ayı ərzində körpələrə qoyulan yeni adlardır. Bu adların valideynlər tərəfindən uşaqlara qoyulması tövsiyə edilib və məqsədəuyğun sayılıb”.
Qeyd edək ki, avqust ayında Nazirlər Kabineti yanında Terminologiya Komissiyasının nəzdində yaradılmış Adlar və Soyadlar üzrə Xüsusi Komissiyaya adlarla bağlı Ədliyyə Nazirliyinin qeydiyyat şöbələrindən daxil olan 48 müraciətə baxılıb və körpələrə 22 adın qoyulmasının qarşısı alınıb. (report)