«Azərikimya» İstehsalat Birliyi ilə «PaşaSığorta» ASC arasında bağlanmış müqavilə əsasında bu ilin əvvəlindən etibarən ARDNŞ-in digər strukturlarında olduğu kimi kimyaçılar da əlavə vəsait ödəmədən müxtəlif səhiyyə müəssisələrində tibbi xidmətlərdən yararlanmaq imkanı qazanmışlar. Bu zaman kimyaçıların hər hansı bir problemlə üzləşməməsi üçün bugünlərdə Birliyin akt zalında «PaşaSığorta» ASC-nin nümayəndələri tərəfindən Birlik kollektivi üçün təqdimat xarakterli maarifləndirici tədbir keçirilmişdir.
Bildirilmişdir ki, «PaşaSığorta» ASC-nin xətti ilə müqavilə bağlamış müəssisə və təşkilatların əməkçiləri Bakı və Sumqayıt şəhərlərində, həmçinin respublikanın digər rayonlarında fəaliyyət göstərən 40-a yaxın tibb müəssisəsində təcili tibbi yardım və evakuasiya, stasionar, ambulator-poliklinik, həmçinin planlı stomatoloji yardım, illik dövri tibbi müayinə, təcili vaksinasiya və digər xidmətlərdən istifadə edə biləcəklər.
Təqdimat mərasimində Birlik əməkdaşlarını maraqlandıran suallar «PaşaSığorta» ASC-nin nümayəndələri tərəfindən əhatəli şəkildə cavablandırılmışdır.