Sumqayıtın 9, 10, 12, 13 və 17-ci mikrorayonları üzrə aztəminatlı ailələrdən olan uşaqlara diqqət və qayğı göstərilərək, şəhərin 10-cu mikrorayonundakı şadlıq sarayında onlar üçün geniş proqramlı əyləncəli konsert və «hədiyyə kampaniyası» təşkil edilmişdir. Çay süfrəsi arxasında keçirilən tədbirdə «Kimyaçı» Mədəniyyət sarayının xalq çalğı alətləri ansamblının ifasında təqdim olunan mahnılar, rəqs kollektivlərinin çıxışları, klounların şən oyunları, illüziya ustalarının təqdim etdikləri rəngarəng proqramlar və müxtəlif səhnəciklər uşaqlar və onların valideynləri tərəfindən alqışlarla qarşılanmışdır.
Tədbirin gedişi zamanı uşaqların fəallıqla, coşqunluqla iştirak etdiyi bilik yarışı keçirilmişdir. Uşaqların maraq dairəsi nəzərə alınaraq, tədbir boyu ekranda müxtəlif cizgi filmlərindən fraqmentlər nümayiş etdirilmişdir.
Tədbirin sonunda hər bir uşağa müxtəlif isti geyim dəstləri və digər hədiyyələr təqdim olunmuşdur. Övladları ilə birgə tədbirdə iştirak edən valideynlər uşaqlara göstərilən diqqət və qayğıya görə tədbirin təşkilatçılarına minnətdarlıqlarını bildirmişlər.
