Menu
Geri İrəli

Sumqayıtda beynəlxalq elmi konfrans keçirilib

Müəllif: sumqayitxeber.com • Tarix: 22 Aprel 2015 • Baxış sayı: 427 dəfə • Şərh yoxdur

333Sumqayıt Dövlət Universitetində (SDU) “Ermənilərin soyqırımı siyasəti bəşəriyyətə qarşı cinayətdir” mövzusunda beynəlxalq elmi konfrans keçirilib. Konfransda Rusiya, Türkiyə, Qırğızıstan və Azərbaycanın bir çox ali təhsil müəssisələrinin professor və alimləri iştirak ediblər.

SDU-nun mətbuat xidmətindən AZƏRTAC–a bildirilib ki, universitetin elm və innovasiyalar üzrə prorektoru, professor Ramazan Məmmədov konfransın plenar iclasını açaraq, tədbirin əhəmiyyətindən danışıb. Prorektor ermənilərin zaman-zaman tarixi saxtalaşdırmaq cəhdlərindən, son 200 ildə azərbaycanlılara qarşı məqsədli şəkildə həyata keçirilən soyqırımı cinayətlərinin xronologiyasından bəhs edərək bildirib ki, XIX əsrin 90-cı illərində, 1905-1907, 1915-1920-ci illərdə Gəncədə, Qubada, Lənkəranda, Şamaxıda, Naxçıvanda, Bakıda, Kürdəmirdə azərbaycanlılara, yəhudilərə, ləzgilərə, kürdlərə və digər yerli əhaliyə qarşı erməni terrorçuları tərəfindən kütləvi qırğınlar törədilib. O illərdən uzun müddət keçməsinə baxmayaraq, tarixçilərimiz, arxeoloqlarımız kütləvi insan qırğınlarının canlı şahidi olan onlarla məzarlıq aşkar ediblər. Azərbaycan dövlətinin həyata keçirdiyi tədbirlər nəticəsində Qubada, Şamaxıda, Gəncədə və bir sıra başqa regionlarda memorial komplekslər yaradılıb, çoxlu əsərlər, məqalələr yazılıb, abidələr qoyulub.

Diqqətə çatdırılıb ki, 1988-1993-cü illərdə Ermənistanın hərbi təcavüzü nəticəsində 20 mindən çox azərbaycanlı həlak olub, 100 mindən çoxu yaralanıb, 50 min nəfər isə əlil olub.

SDU-nun tarix və coğrafiya fakültəsinin dekanı, professor Adil Baxşəliyev “1918-ci ilin mart soyqırımı Azərbaycan tarixinin qanlı səhifəsidir” mövzusunda məruzə ilə çıxış edib. Bildirilib ki, mart qırğınları xalqımıza qarşı zaman-zaman həyata keçirilən soyqırımı siyasətinin ən dəhşətli səhifələrindən biridir. Erməni daşnakları üç gündə təkcə Bakıda 12 min azərbaycanlının həyatına son qoyub.

Azərbaycan Texniki Universitetinin tarix kafedrasının müdiri, professor Şikar Qasımovun “Xocalı faciəsi ermənilərin azərbaycanlılara qarşı soyqırımı siyasətinin nəticəsidir” mövzusunda məruzəsi dinlənilib. Professor erməni hərbi birləşmələri və Xankəndidə yerləşən keçmiş sovet ordusunun 366-cı alayının hərbçiləri tərəfindən 1992-ci il fevralın 25-dən 26-na keçən gecə törədilən Xocalı soyqırımının məkrli erməni siyasətinin növbəti qanlı cinayətlərindən biri olduğunu söyləyib. Qeyd edilib ki, Xocalıda dinc əhaliyə qarşı həyata keçirilən qətliam təkcə Azərbaycan xalqına qarşı soyqırımı deyil, bütövlükdə bəşəriyyətə yönələn qanlı cinayətdir.

Sonra AMEA-nın A.A.Bakıxanov adına Tarix İnstitutunun Qarabağ şöbəsinin müdiri, professor Qasım Hacıyev “Azərbaycanlılara qarşı erməni soyqırımları” mövzusunda çıxış edib.

İkigünlük konfrans aprelin 22-də işini “Ermənilərin Türkiyəyə qarşı uydurma soyqırımı iddiaları və tarixi həqiqətlər” və “Ermənilərin Azərbaycanda törətdikləri soyqırımları” bölmələri üzrə davam etdirəcək.

Facebook Şərhləndirmə:

Şərhinizi yazın